युनियन एजुकेशनका निर्देशक तथा रन्त माबी तनहुँका प्रधानाध्यापक  रमेशबाबु भट्टराईले व्यास समता विद्यालयका असहाय बालबालिकालाई सहयोग गरेका छन् ।  ५६औँ अन्तराष्ट्रिय साक्षरता दिवसको अवसरमा भट्टराईले तनहुँको व्यास–७ शेराटारस्थित  समता विद्यालयका बालबालिकालाई विद्यालय पोशाक र खाद्यान्न सहयोग गरेका हुन् । 

व्यास नगरपालिकाले अनाथ, असहाय, विपन्न, शहीद, बेपत्ता र अन्य कारणले अभिभावकको मृत्यु भएका परिवारका बालबालिकालाई लक्षित गरी समता बिद्यालय सञ्चालनमा ल्याएको छ ।

व्यास नगरपालिकाका प्रमुख बैकुण्ठ न्यौपाने र उपप्रमुख इन्दिरा दरै, विद्यालय व्यवस्थापन समितिका अध्यक्ष सतिशचन्द्र न्यौपानेको उपस्थितीमा सो विद्यालयमा पढने ४५ जना बालबालिकालाई ५६ हजार बराबरको विद्यालय पोशाक र खाद्यान्न सामग्री सहयोग गरेको उनले जानकारी दिए ।  

भट्टराईद्धारा गरिएको सहयोग प्रति आभार व्यक्त गर्दै समितिका अध्यक्ष न्यौपानेले विद्यालय र बालबालिकाको बिकासमा सधै क्रियाशिल रहने बताए । 

पछिल्लो समय समाज सेवामा भट्टराई  सक्रिय छन्   । भट्टराईले विपन्न बालबालिकालाई शिक्षाको मूलधारमा समेट्ने नगरपालिकाको अभियानलाई सघाउन समता विद्याालयका बालबालिकालाई सहयोग गरेको बताए । 

आवासीय रुपमा सेवा लिइरहेका बालबालिकाको पठनपाठनमा सहयोग पुगोस भन्ने उद्येश्यले सहयोग गरेको भट्टराईको भनाई छ । 

 विद्यालयमा हाल ४५ जना बालबालिकाहरुले आवासीय रुपमा विद्यालयमै रहेर शिक्षा लिइरहेका छन् भने नगरपालिकाले त्यसको भौतिक र शैक्षिक संरचना बिस्तार गरिरहेको छ ।