पुष्पकमल दाहाल नेतृत्वको मन्त्रिमण्डलमा १५ जना नयाँ सांसद पहिलो पटक मन्त्री बनेका छन्। तीन राज्य मन्त्रीसहित २५ सदस्यीय मन्त्रीमण्डल रहने व्यवस्था अनुसार २२ जना फुल मन्त्री बनाउँदा नयाँ सांसदले अवसर पाएका हुन्।

माओवादीका प्रधानमन्त्रीसहित ६ मन्त्रीमध्ये २ जना नयाँ छन् भने एमालेका ८ मन्त्री मध्ये ६ जना नयाँ छन्। यसैगरी राप्रपाबाट २ जना नयाँ छन भने राष्ट्रिय स्वतन्त्र पार्टी (रास्वपा) का सबै मन्त्री नयाँ हुन्। 

मंगलबार विस्तार भएको दाहाल नेतृत्वको मन्त्रिमण्डलमा माओवादीबाट सुदन किराती, अमनलाल मोदीले पहिलो पटक मन्त्रीको अवसर पाएका हुन्। यी दुवैजनाले लगातार तीनपटक सांसद जितेका छन् र तेस्रो पटकमा बल्ल मन्त्री बन्ने अवसर पाएका छन्।

एमालेबाट धनकुटाका सांसद राजेन्द्रकुमार राई, पर्वतका सांसद पदम गिरी, बैतडीका दामोदर भण्डारी, सुनसरी ३ बाट निर्वाचित भगवती चौधरी, सर्लाही क्षेत्र नम्बर ३ बाट निर्वाचित हरि उप्रेती र राष्ट्रिय सभा सदस्य विमला शर्मा पौड्यालले पनि पहिलो पटक मन्त्री बन्ने अवसर पाएका हुन्। 

यसैगरी राष्ट्रिय प्रजातन्त्र पार्टीबाट अध्यक्ष राजेन्द्र लिङ्देन, महामन्त्री तथा सांसद ध्रुबबहादुर प्रधानले पनि पहिलो पटक मन्त्रालयको नेतृत्व पाएका छन्। 

राष्ट्रिय स्वतन्त्र पार्टीले बनाएका सबै मन्त्री नयाँ हुन्। उपप्रधान एवम् गृहमन्त्री रवि लामिछाने, शिक्षा, विज्ञान तथा प्रविधिमा शिशिर खनाल र श्रम, रोजगार तथा समाजिक सुरक्षा मन्त्री बनेका डोलप्रसाद अर्याल पनि पहिलो पटक मन्त्रालय हाँक्दैछन्। 

त्यसैगरी जनमत पार्टीका अब्दुल खान पनि पहिलो पटक मन्त्री बन्दैछन्। जनमत अध्यक्ष डा. सीके राउतले मन्त्री नबन्ने बताएपछि उनले अवसर पाएका हुन्।