राष्ट्रिय प्रजातन्त्र पार्टी नेपालका अध्यक्ष कमल थापाले उपप्रधानमन्त्री राजेन्द्र लिङ्देन बधाई दिएका छन् । लिङ्देन उपप्रधानमन्त्री नियुक्त भएको तेस्रो दिनमा उनले सामाजिक सञ्जालमार्फत बधाई दिएका हुन् ।

आफ्नो पूर्वपार्टी राप्रपाका अध्यक्षसमेत रहेका लिङदेनलाई वधाई दिदै उनले भनेका छन्–‘केही असहमति, मतभिन्नता र केही चित्त दुखाइका बाबजुद मैले धेरै आडभरोसा र विश्वास गरेका राप्रपाका अध्यक्ष राजेन्द्र लिङ्देन देशको उपप्रधानमन्त्रीजस्तो गरीमामय पदमा नियुक्त हुनुभएकोमा खुशी लागेको छ।’

थापाले राप्रपाबाट मन्त्री र राज्यमन्त्री नियुक्त भएका विक्रम पाण्डे, धु्रवबहादुर प्रधान र दिपक सिंहलाई पनि बधाइ र शुभकामना दिएका छन् । लिङदेन उपप्रधानसहित ऊर्जा, जलस्रोत तथा सिँचाइ मन्त्री भएका छन्।

उनलाई माघ ३ गते राष्ट्रपति विद्यादेवी भण्डारीले शितल निवासमा आयोजित कार्यक्रममा शपथ खुवाएकी थिईन। प्रधानमन्त्री पुष्पकमल दाहाल नेतृत्वको अहिलेको सरकारमा उपप्रधानमन्त्री ४ जना छन्।

नेकपा माओवादी केन्द्रका वरिष्ठ उपाध्यक्ष नारायणकाजी श्रेष्ठ, एमाले उपाध्यक्ष विष्णु पौडेल र राष्ट्रिय स्वतन्त्र पार्टीका सभापति रवि लामिछाने गत पुस ११ मा उपप्रधानमन्त्री नियुक्त भइसकेका थिए।

श्रेष्ठ भौतिक योजना तथा यातायात मन्त्री, पौडेल अर्थमन्त्री र लामिछाने गृहमन्त्री छन्।