नेकपा एमालेका अध्यक्ष केपी शर्मा ओलीप्रति रुष्ट भएका जनता समाजवादी पार्टीका अध्यक्ष उपेन्द्र यादव उनैलाई भेटन वालकोट पुगेका छन् । यादवले ओलीलाई भेटेर मन्त्रालय बाँडफाँटसहित पावर शेयरिङमा जसपालाई पाखा पारिएको गुनासो गरेका छन् ।

स्रोतका अनुसार सत्ता साझेदार दलहरूको भागबण्डामा हेपिएको भन्दै असन्तुष्ट बनेका यादव उपराष्ट्रपति जसपाको भागमा पार्न चाहन्छन् । यसो हुँदा यादवलाई दोहोरो फाईदा हुनेछ। पहिलो आफनो पार्टीले उपराष्ट्रपति पाउने छ भने दोस्रो उनको प्रतिनिधि सभाको यात्रा पनि सुनिश्चित हुनेछ।

अहिलेसम्म उपराष्ट्रपति माओवादीले पाउने भनिएको छ । यादव सो पदमा रामसहाय यादवलाई पठाएर आफू उपनिर्वाचनमार्फत प्रतिनिधि सभामा पुग्न चाहन्छन् । मन्त्रालयको भागबण्डामा पनि यादवले ओलीसँग असन्तुष्टि व्यक्त गरेका छन् ।

जसपाका लागि वन मन्त्रालय र युवा खेलकुद मन्त्रालय राखिएको छ । यादवले भने समग्र भागबण्डाका विषयमा छलफल भएको र यो कुरा प्रधानमन्त्रीसँग पनि भएको बताएका छन् ।

जसपालाई सरकारमा सहभागी भएर अहिलेको गठबन्धन बलियो बनाउन ओलीले आग्रह गरेका छन् । चुनावमा पनि एमालेसँग मिलेर गएकाले अब पनि सोही अनुसार अघि बढ्ने र केही तलमाथि भएको आफूले मिलाउने आश्वासन ओलीले दिएका छन् ।

यादवले उपसभामुख निर्वाचनअघि ओलीसँग भेटेर आफ्नो सरोकार राखेको बताए । उनको एउटै मात्र ध्याउन्न रामसहाय यादवलाई उपराष्ट्रपति वनाएर उनको क्षेत्रमा उपनिर्वाचन गराई आफु सांसद वन्ने रहेको श्रोतको दावी छ।