आफु विरुद्ध जनमत वढ्दै गएका वेला काठमाडौं महानगरपालिकाका मेयर बालेन्द्र साहले प्रधानमन्त्री पुष्पकमल दाहालसँग भेट गरेका छन् । मेयर साहले आज बिहान प्रधानमन्त्री निवास बालुवाटार पुगेर दाहाललाई भेटेका हुन् ।

पछिल्लो समय मेयर साहविरुद्धको जनमत बढ्न थालेको छ । आइतबार मात्रै गरीबको उठिबास लगाउन खोजेको, सम्पदा मास्न खोजेको लगायतका आरोप लगाउँदै बालेन्द्र विरुद्ध काठमाडौंमा आन्दोलन भएको थियो ।

आन्दोलनमा मेयरका पराजित उम्मेदवार सुमन सायमी पनि सहभागि थिए । मेयरमा बालेन्द्र साह निर्वाचित भएपछि निकालेको विजय जुलुसमा उनीसँग पराजित भएका स्वतन्त्र उम्मेदवार सुमन सायमी पनि सहभागी भएका थिए । उनले आफूले नजिते पनि आफ्नो जस्तै उद्देश्य र मुद्दा भएको मान्छेले जित्दा खुशी लागेको सञ्चारमाध्यमलाई प्रतिक्रिया दिएका थिए ।

तर निर्वाचनको १० महिनापछि नै सायमी बालेनविरुद्ध सडक संघर्षमै उत्रिएका छन् । यहाँसम्म आइपुग्दा बालेन्द्र र उनको उद्देश्यमा आकाश–जमिनको फरक देखिएको छ । बालेन्द्रले निजी सम्पत्तिमा डोजर चलाएको, संविधान र कानुनले दिएको अधिकारसमेत हनन गरेको भन्दै सायमीले आइतबार माइतीघरमण्डलामा भने ‘पहिलेका शासक भन्दा पनि यिनी महानिरंकुश भएर आएका छन् ।’

महानगरले मनपरिरुपमा डोजर चलाउन थालेपछि विरोध हुन थालेको छ । केही ठाउँमा काम रोकिन थालेपछि बालेन्द्रले तत्काििलन गृहमन्त्री रवि लामिछानेसँग पनि सहयोग मागेका थिए ।