वन्यजन्तु चोरी शिकारीको घटनामा संलग्न भएका आरोपमा सांसद प्रमोदकुमार जयसवालका चालक सलिम मियाँ अन्सारी पक्राउ परेका छन् । उनलाई पर्सा राष्ट्रिय निकुञ्जले नियन्त्रणमा लिएको हो।

निकुञ्ज आडमै रहेको प्रदेश सांसद जयसवालको घरबाट गत पुस ४ गते सखुवा प्रसौनी– १ का ३७ वर्षीय झापस दास थारु, ४४ वर्षीय विशाल सहनी, काभ्रे सांगा ६ का ५० वर्षीय दामोदर अधिकारी, धादिङ गंगाजमुना २ का ५२ वर्षीय म्लाङ दोङ तामाङलाई मृत हरिणसहित अवैध हातहतियारसहित नियन्त्रणमा लिएको थियो ।

अवैध रुपमा शिकार गरेर मारिएको जरायो बोक्न प्रदेश २ ०३००१ च ३०९७ नम्बरको सेतो जिप प्रयोग भएको थियो । सोही गाडीमा रहेका तस्करहरुले निकुञ्जका सुरक्षाकर्मीलाई लक्षित गरेर गोली हानेर भागेका थिए । जवाफी फायरिङमा उक्त गाडीको टायरमा गोली लागेपछि जंगल आडैमा रहेको सखुवा प्रसौनी गाउँपालिका–१ स्थित अकुनिया गाउँमा गाडी रोकेर भागेका थिए ।

उनीहरू गाडीलाई बीच बाटोमै छाडेर अवैध तस्करीमा सेल्टरको रुपमा प्रयोग हुँदै आएको सांसद जयसवालको घर गएका थिए । त्यहाँबाट हतियारसहित जरायोको सिंहसहितको टाउको बरादम भएको थियो ।

सांसद जयसवाल बयान दिन निकुञ्ज कार्यालय आएको बेला चालक मियाँलाई नियन्त्रणमा लिइएको हो। सांसद जयसवालसहित उनका भाइ एवं सखुवा प्रसौनीका पूर्व गाउँपालिका अध्यक्ष प्रदीप जयसवालले पनि बयान दिएका छन् ।

तस्करीमा प्रयोग भएको बन्दुक वाग्मती प्रदेशअन्तर्गत काठमाडौं क्षेत्र नम्बर ५(२)का सांसद श्याम खड्काको भएको खुलेको छ।