सिरहाकाको मिर्चैयामा जारी आन्दोलनमा प्रहरीले गोली चलाएको छ। मिर्चैया नगरपालिका–३ स्थित सगरमाथा माविमा कक्षा ८ मा अध्ययनरत छात्राको मृत्युपछि अहिले प्रदर्शन भइरहेको छ । 

प्रदर्शनकारीले ईलाका प्रहरी कार्यालय मिर्चैयामा घेरा हालेपछि ६ राउण्ड हवाई फायर गरिएको जिल्ला प्रहरी कार्यालय सिरहाका डीएसपी सुवास बुढाथोकीले बताए । 

भिड नियन्त्रणमा लिन प्रहरीले ३ राउण्ड अश्रु ग्याँस पनि प्रहार गरेको छ । प्रदर्शनकारीले ढुंगा प्रहार गर्दा ७ जना प्रहरी घाइते भएका छन् ।  सगरमाथा माविमा अध्ययनरत १५ वर्षीया छात्रा सिर्जनाकुमारी महराको गएराति मृत्यु भएको थियो ।

सिरहा नगरपालिका ११ भलुवाहीकी सिर्जनाले पुस २२ गते पेट दुखेपछि औषधि खान पानी मागेकी थिइन् । शिक्षिका अम्बिका लम्सालले पानी भनेर स्प्रिट दिएको र त्यो खाएपछि सिर्जनाको मृत्यु भएको जनाईएको छ। शिक्षिकाले जानेर नभई झुक्किएर स्प्रिट दिएको पाईएको छ।

सिर्जनालाई उपचारका लागि तत्कालै कर्जन्हास्थित फुलकुमारी महतो मेमोरियल अस्पताल लगिएको थियो । उपचारको क्रममा शनिबार साँझ उनको मृत्यु भएको छ । शिक्षिकाको लापरबाहीले मृत्यु भएको भन्दै बिहानैदेखि विद्यार्थी र आफन्तले आन्दोलन गरिरहेका छन् ।