कपिलवस्तुको वाणगंगामा एकै घरका दुई बालिकालाई सर्पले डस्दा वहिनीको मृत्यु भएको छ भने दिदीको अवस्था गम्भीर छ ।

वाणगंगा नगरपालिका– ९ भलवाड जिनुवास्थित मोतीलाल क्षेत्रीका छोरीहरु ३ वर्षीय रीतिका र ८ वर्षीय इशिकालाई मंगलबार राति सर्पले डसेको थियो । उनीहरु मध्ये एक जनाको कान र अर्कोको हातमा सर्पले डसेको बताइएको छ ।

दुवैलाई गोरुसिंगेस्थित सर्पदंश उपचार केन्द्रमा भर्ना गरिएको थियो। त्यहाँ उपचार हुन नसकेपछि बुटवल पठाइएकोमा बहिनीको मृत्यु भएको र दिदीको अवस्था चिन्ताजनक रहेको वडाध्यक्ष कमल पौडेलले बताए ।

लुम्बिनी प्रादेशिक अस्पताल ल्याइएकी रीतिकाको उपचारको क्रममा मृत्यु भएको जनाईएको छ। इशिकालाई भने भेण्टिलेटरमा राखेर उपचार भइरहेको अस्पतालका सूचना अधिकारी डा. नेत्रबहादुर रानाले जानकारी दिए ।