नेपालमा अमेरिकी सक्रियता बढिरहेका बेला भारतीय विदेश सचिव विनयमोहन क्वात्राको पनि भ्रमण निस्चित भएको छ। परराष्ट्र मन्त्रालय स्रोतका अनुसार क्वात्रा दुईदिने भ्रमणमा काठमाडौँ आउन लागेका हुन्। 

अमेरिकाले नेपालमा राजनीतिक सक्रियता बढाएका बेला छिमेकी भारतका तर्फबाट पनि भ्रमण तय भएको हो। अमेरिका र युरोपबाट तारन्तार भ्रमण भएपछि नयाँ दिल्ली सशंकित बनेको बताइन्छ। 

‘भारतीय विदेश सचिवको भ्रमणको तयारी भइरहेको छ। आज घोषणा हुनेछ’, मन्त्रालय स्रोतले भन्यो।  गत पुसमा नेकपा माओवादी केन्द्रका अध्यक्ष पुष्पकमल दाहाल नेतृत्वमा नयाँ सरकार गठन भएयया नेपाल आउन लागेका क्वात्रा उच्च भारतीय अधिकारी हुन्।

परराष्ट्र सचिव भरतराज पौड्यालको मैत्रीपूर्ण निमन्त्रणामा क्वात्रा नेपाल आउने भएका हुन्। पौड्याल क्वात्राको निमन्त्रणामा गत सेप्टेम्बर १३ र १४ मा भारत यात्रामा गएका थिए। नेपालमा रहँदा क्वात्राले राष्ट्रपति विद्यादेवी भण्डारी, प्रधानमन्त्री दाहाल, परराष्ट्रमन्त्री विमला राई, एमाले अध्यक्ष केपी शर्मा ओली र कांग्रेस सभापति शेरबहादुर देउवा लगायतसँग भेट्नेछन्। 

क्वात्राको भ्रमणमा प्रधानमन्त्री दाहालको सम्भावित भारत भ्रमणबारे पनि कुरा हुनेछ। यसअघि राजनीतिक मामिला हेर्ने अमेरिकी उपविदेशमन्त्री भिक्टोरिया नुल्यान्ड अघिल्लो साता नेपाल भ्रमण गरेर फर्केलगत्तै यही साता अमेरिकी अन्तर्राष्ट्रिय सहयोग नियोग यूएसएआईडीकी प्रमुख समान्था पावर नेपाल आएकी थिईन। 

यसैगरी आगामी सोमबार अमेरिकी उपसहायक विदेशमन्त्री अफ्रिन अख्तर पनि नेपाल आउने तय भएको छ। क्वात्रा आएकै दिन अख्तर पनि काठमाडौँ उत्रनेछिन्। यही हप्ता अमेरिकाकै रणनीतिक साझेदार एवम् क्षेत्रीय संगठन युरोपेली संघ (ईयू) की अन्तर्राष्ट्रिय सहकार्य हेर्ने आयुक्त जुटा उर्पिलाइनेन बुधबार एकदिने भ्रमण सकेर फर्किएकी थिईन। 
 

विनय मोहन क्‍वात्रा