केपी ओली नेतृत्वको उच्चस्तरीय राजनीतिक संयन्त्रको बैठकमा सत्तारुढ गठबन्धनका तीन सहयात्री दल उपस्थित भएका छैनन् ।

बैठकमा एमाले अध्यक्ष ओलीसहित प्रधानमन्त्री तथा माओवादी अध्यक्ष पुस्पकमल दाहाल, राष्ट्रिय स्वतन्त्र पार्टीका सभापति रवि लामिछाने र राष्ट्रिय प्रजातन्त्र पार्टीका अध्यक्ष राजेन्द्र लिङदेन सहभागी छन् ।

तर, जनता समाजवादी पार्टीका अध्यक्ष उपेन्द्र यादव, जनमत पार्टीका अध्यक्ष सीके राउत र नागरिक उन्मुक्ति पार्टीका अध्यक्ष रञ्जिता श्रेष्ठ बैठकमा गएका छैनन्। जसपा प्रवक्ता मनिष सुमनका अनुसार यादव अहिले जनकपुरबाट काठमाडौं फर्किँदै छन् । उनी आइपुग्दासम्म बैठक सकिएन भने सहभागी हुने सुमनले जानकारी दिए ।

जनमत पार्टी सचिवालयका अनुसार सीके राउत पनि आएनन् । उनी विवेकशील साझाको महाधिवेशनमा पुगेका छन् । नागरिक उन्मुक्तिकी श्रेष्ठले आफू डिल्लीबजार कारागारमा रहेको बताइन् ।

नागरिक उन्मुक्ति यसअघि पनि संयन्त्रको बैठकमा गएको थिएन । सो पार्टीले हिजो सुदूरपश्चिमका मुख्यमन्त्रीलाई विश्वासको मत नदिएपछि सरकार ढलेको छ ।