किशोरीहरुलाई बन्धक बनाएर यौन दुर्ब्यवहार गरेको आरोपमा काठमाण्डौंबाट प्रहरीले एक चीनियाँ नागरिकलाई पक्राउ गरेको छ। चिनियाँ नागरिक याङ लि मिङलाई प्रहरीले पक्राउ गरेको हो।

उनले विभिन्न प्रलोभन देखाएर विभिन्न जिल्लाबाट ५ जना किशोरीलाई काठमाण्डौं ल्याई बन्धक बनाएको प्रहरीको आरोप छ। नेपाल प्रहरीको केन्द्रीय अनुसन्धान ब्यूरो (सीआईबी) का निर्देशक उत्तमराज सुवेदीका अनुसार प्रहरीले ५ जना किशोरीलाई उद्दार गरेको छ ।

तीमध्ये दुई जनालाई यौन दुर्व्यवहार गरेको आशंका गरिएको उनले बताए । ललितपुरको गोंगटीमा उनीहरुलाई राखेको पाइएको छ । एक जना किशोरीले परिवारसँग सम्पर्क गरेपछि ब्यूरोसम्म चिनियाँ नागरिकबारे कुरा पुगेको थियो ।

त्यसक्रममा तीन चिनियाँ नागरिकले विभिन्न प्रलोभन देखाएर किशोरीहरुलाई काठमाडौं बोलाएको पाइएको प्रहरीको भनाइ छ । ‘ललितपुरको घटना भएकाले त्यहीँबाट मुद्दा चलाउने गरी पठाएका छौं’, सुवेदीले भने, ‘थप अनुसन्धान ललितपुरबाटै भइरहेको छ ।’