किलिएन एमबाप्पेले ‘थाई इन्जुरी’ का कारण च्याम्पियन लिग अन्तिम १६ अन्तर्गत बायर्न म्युनिख विरुद्धको खेल खेल्न नपाउने भएका छन् । करिब तीन साता बाहिर बस्नुपर्ने भएपछि एमबाप्पेले खेल गुमाउने भएका हुन् ।

बुधबार फ्रेन्च लिग वानमा मोन्टेपिलरलाई ३–१ ले हराउँद एमबाप्पे घाइते भएका थिए। चोट लागेपछि २१ औं मिनेटमा उनले मैदान छाड्नु परेको थियो। उक्त खेलमा एमबाप्पेले २ वटा पेनाल्टीमा गोल गर्न चुकेका थिए । पीएसजीले फेव्रुअरी १४ मा घरेलु मैदानमा जर्मन च्याम्पियन्स बायर्न विरुद्ध खेल्नेछ ।

२४ वर्षीय एमबाप्पेले फ्रेन्च कप अन्तर्गत मार्सेल विरुद्ध फेब्रुअरी ८ मा हुने खेल समेत गुमाउनेछन् । साथै फेब्रुअरी ११ मा हुने मोनाको विरुद्धको खेल पनि उनले गुमाउने छन् । एमबाप्पेले यस सिजन पेरिस क्लबका लागि २६ खेलमा २५ गोल गरेका छन् ।

च्याम्पियन्स लिगमा बायर्न विरुद्धको दोस्रो लिग भने उनले खेल्न सक्ने सम्भावना छ । दोस्रो लिगको खेल मार्च ८ मा हुनेछ ।