भृकुटीमण्डपस्थित फनपार्कको जग्गा सस्तोमा भाडामा दिएर मतियारको भूमिका निर्वाह गरेको आरोप लागेका नेपाली कांग्रेसका सांसद टेकबहादुर गुरुङ भ्रष्टाचारको मुद्दामा दोषी ठहर भएका छन्।

विशेष अदालतले गुरुङलाई भ्रष्टाचारी ठहर गरेको हो। विशेष अदालतका अध्यक्ष श्रीकान्त पौडेल, सदस्य शालिग्राम कोइराला र बलभद्र बास्तोलाको इजलासले गुरुङलाई दोषी ठहर गर्दै फैसला सुनाएको छ। 

गुरुङलाई के कति सजाय हुने भन्ने फागुन २५ गते निर्धारण हुने विशेष अदालतका प्रवक्ता दीपेन्द्रनाथ योगीले जानकारी दिए। यो मुद्दामा गुरुङसहित ९ जनालाई अदालतले दोषि ठहर गरेको छ। 

अख्तियार दुरुपयोग अनुसन्धान आयोगले २०७५ माघ २१ गते निलम्बित सांसद गुरुङसहित १४ जनाविरुद्ध भ्रष्टाचार मुद्दा दायर गरेको थियो । भृकुटीमण्डपको ६० रोपनी जग्गा प्रतिमहिना ५ लाख ५५ हजार रुपैयाँ भाडामा १० वर्षका लागि फनपार्कलाई दिने निर्णयमा गुरुङ पनि संलग्न देखिएका हुन्।

मनाङबाट निर्वाचित सांसद गुरुङ यही मुद्दाका कारण निलम्बनमा छन्।
 

टेकवहादुर गुरुङ