राष्ट्रिय किताबखानाले नेपाल सरकारका सचिव र सहसचिवलालाई सात दिनभित्र आफ्नो व्यक्तिगत विवरण अद्यावधिक गर्न सूचना जारी गरेको छ। संघीय निजामती सेवा ऐन जारी हुन लागेको बेला किताव खानाले यस्तो सूचना जारी गिरेको हो।

सरकारले विज्ञताका आधारमा कर्मचारी खटाउने तयारी गरिरहेको र निजामती सेवा नियमावली (२०५०) को नियम १० मा भएको व्यवस्था बमोजिम यस्तो निर्णय गरिएको किताबखानाले जनाएको हो। 

सचिव र सहसचिव पदमा पुगेका कर्मचारी पनि सुरुमा खरिदार वा नासुसरहको पदबाट सेवा प्रवेश गरेको भए उनीहरूको व्यक्तिगत विवरणमा एसएलसी वा प्रवीणता प्रमाणपत्र तहको मात्र शैक्षिक योग्यता रहेको तर त्यसपछि अधावधिक भए नभएको बुझ्न विवरणबारे जानकारी लिन खोजिएको स्रोतले बतायो। 

विवरण अद्यावधिक गर्न किताबखानाको वेबसाइटमा रहेको इमेलमार्फत वा स्वयम् कागजात लिई पुल्चोकस्थित कार्यालयमा गई विवरण अद्यावधिक गर्न सकिने छ। हाल निजामती सेवामा सचिवसरहका ७० र सहसचिव सरहका सबै सेवा समूहका झन्डै ७ सय ५३ कर्मचारीहरू कार्यरत छन्।