झण्डै प्रतिपक्ष विहिन भएको संसदमा कांग्रेस–एमाले दुवै प्रतिपक्ष
नेकपा माओवादी केन्द्रका अध्यक्ष पुष्पकमल दाहाल नेतृत्वको सरकारलाई नेपाली कांग्रेस समेतले विश्वासको मत दिएपछि प्रतिपक्ष विहिन अवस्थामा पुगेको प्रतिनिधि सभाको आजको वैठकमा कांग्रेस र एमाले दुवै प्रतिपक्षको वेन्चमा देखिने भएका छन्।
नेकपा एमालेले सरकारलाई दिएको समर्थन फिर्ता लिएपछि आजको वैठकमा एमाले र कांग्रे दुवै प्रतिपक्षको बेञ्चमा बस्ने भएका छन् । सरकारलाई विश्वासको मत दिएको कांग्रेस र विश्वासको मत फिर्ता लिएको एमाले दुवै प्रतिपक्षको बेञ्चमा बस्ने भएको जनाईएको छ।
कांग्रेसका प्रमुख सचेतक रमेश लेखकले सरकारलाई विश्वासको मत दिए पनि सरकारमा सामेल नभएसम्म प्रतिपक्षीको कुर्सीमा बस्ने वताए । सरकारलाई विश्वासको मत दिएकाले कांग्रेस प्रतिपक्षमा बस्न नपाउने भन्दै सर्वोच्च अदालतमा मुद्दा परिरहेको बेला कांग्रेस आजको बैठकमा पनि प्रतिपक्षको कुर्सीमा नै बस्न लागेको हो ।
उता, दाहाल नेतृत्वको सरकारलाई दिएको समर्थन र सरकारबाट बाहिरिएसँगै एमाले भने प्रतिपक्षमा बस्न लागेको हो । त्यसका लागि संसद् सचिवालयमा पनि जानकारी गराइसकेको छ ।
प्रतिनिधिसभाको बैठक आज अपरान्ह १ बजे संघीय संसद् भवन नयाँबानेश्वरमा बस्दैछ। बैठकमा सभामुखले राष्ट्रपति कार्यालयबाट आएको सन्देशको ब्यहोरा जानकारी गराउने कार्यसूची छ । त्यसैगरी राष्ट्रिय सभाबाट सन्देशसहित प्राप्त अनुगमन तथा मूल्याङ्कन विधेयक, २०७८ माथि विचार गरियोस् भन्ने प्रस्तावलाई निर्णयार्थ प्रस्तुत गरिनेछ ।
प्रधानमन्त्री पुष्पकमल दाहालले ‘संवैधानिक परिषद् (काम, कर्तव्य, अधिकार र कार्यविधि) सम्बन्धी (पहिलो संशोधन) विधेयक, २०७९’ लाई प्रस्तुत गर्न अनुमति माग्ने र प्रस्ताव प्रस्तुत गर्ने कार्यसूची रहेको संसद् सचिवालयले जानकारी दिएको छ ।
