नेकपा एमालेका अध्यक्ष केपी शर्मा ओलीले नेपाली क्रिकेट टिमलाई उच्च आत्मबलका साथ खेल्ने शुभकामना दिएका छन् । ओलीले आज ट्वीटर मार्फत यस्तो शुभकामना दिएका हुन।

‘मलाई आजको दिनको प्रतीक्षा अस्तिदेखि नै थियो। ऊच्च आत्मबलका साथ नेपाललाई विश्वकपमा प्रवेश गराउने सफलताको लागि नेपाली क्रिकेट टिमलाई शुभकामना !’ उनले लेखेका छन्–‘राष्ट्र तपाईंहरूको साथमा छ, म तपाईंहरूको साथमा छु ।’

आईसीसी विश्वकप लिग २ अन्तर्गत आज नेपालले यूएईसँग प्रतिस्पर्धा गर्दैछ। आफ्नो अन्तिम तथा महत्वपूर्ण खेलमा जित निकाल्न सके नेपाल जिम्बाब्वेमा हुने ‘विश्वकप क्रिकेटको ग्लोबल क्वालिफायर’ मा सिधै छनोट हुनेछ।

लिग २ को अन्तिम शृंखलाअन्तर्गतका सबै खेलहरुमा अविजित रहेको नेपाल सोही नतिजा दोहो¥याउने लक्ष्यका साथ मैदानमा उत्रिनेछ।  दुई देश बीचको खेल बिहीबार बिहान साढे ९ बजे कीर्तिपुर मैदानमा सुरु हुनेछ। 

लिग २ को ३ शीर्ष टोली ३ महिनापछि ‘विश्वकप क्रिकेटको ग्लोबल क्वालिफायर’मा छनोट हुनेछन्। स्कटल्यान्ड ५० अंक र ओमन ४४ अंकसहित शीर्ष दुई स्थानमा रहँदै विश्वकप क्वालिफायरका लागि छनोट भइसकेका छन्। तेस्रो स्थानमा रहेको नामिबियाको ३९ अंक छ। चौथो स्थानमा रहेको नेपालको ३८ अंक छ। बिहीबारको खेलमा यूएईसँग जित हात पारे नेपालले २ अंक पाउनेछ। 

यूएई ३३ अंकका साथ छैटौं स्थानमा छ। ३५ अंकसहित अमेरिका पाँचौ स्थानमा छ। अमेरिकाले लिग २ का सबै खेल खेलिसकेको छ। यूएई र नेपाल बिहीबार अन्तिम खेल खेल्न लागेका हुन्।