नेपाली कांग्रेसका महामन्त्री गगन थापाले ‘एमालेसँग मिल्न ०८४ सालभन्दा अगाडि सम्भव छैन’ भनेपछि एमाले अध्यक्ष केपी शर्मा ओलीले त्यसको जवाफ फर्काएका छन् ।

उपराष्ट्रपति निर्वाचनमा मतदान गरेर बाहिरिने क्रममा ओलीले कांग्रेसलाई प्रतिपक्षमा भेट्न ०८४ साल पर्खिनु नपर्ने वताए । ‘एकजना अलिक चर्का कांग्रेसले कति सालपछि भेट हुन्छ भन्नुभएछ । प्रतिपक्षमा भेट्न ०८४ साल पर्खिनुपर्छ ? अहिले भेट्नुभएको छैन । उहाँहरूको यो कुराले उहाँहरूभित्र निकै ठूलो गडबडी देखिन्छ । नत्र किन त्यस्तो बोल्नुप¥यो ?’ उनले भने–‘त्यहाँभित्र गडबडी होलान् । त्यसैकारण बोल्नुभएको हो कि ?’

यसअघि फागुन २५ गते भएको राष्ट्रपतिको निर्वाचनपछि ओलीले कांग्रेससँग नमिल्ने भनेर आफूहरूले कसम नखाएको अभिव्यक्ति दिएका थिए । त्यस लगत्तै कांग्रेस महामन्त्री थापाले ओलीलाई जवाफ फर्काउँदै २०८४ सालसम्म त्यो सम्भव नभएको बताएका थिए । त्यसको जवाफ आज ओलीले फर्काएका हुन् ।

उनले डोमोक्रेटिक सिस्टममा हारजित हुने कुरा स्वाभाविक भएको बताए । ‘अहिले साँठगाँठको सिस्टम भयो । यसमा कसले जित्यो कसले हा¥यो ? कसको शक्ति कति भन्ने नै भएन ?’ उनले भने–‘अहिले त जनमत पार्टीले उपराष्ट्रपतिमा उम्मेदवार उठाएको छ । यस्तोमा के हिसाब हुन्छ ।’

उनले संघदेखि प्रदेशसम्म प्रतिपक्षमा पुगेपनि देश र जनताको पक्षमा काम गर्ने बताए । आगामी रणनीतिबारे अहिल्यै भन्न आवश्यक नभएको ओलीको भनाई छ ।
 

गगन थापा केपी शर्मा ओली