कोशी प्रदेशको नामावकरण विरुद्ध आन्दोलन गरिरहेको पहिचान पक्षधरले मुख्यमन्त्री, मन्त्री र राजनीतिक दलका नेतालाई टार्गेटमा राखेका छन् । उनीहरुले पटक पटक आक्रमणको प्रयास गरेपछि नेताहरुको असुरक्षा वढेको छ।

नेकपा माओवादी केन्द्र कोशी प्रदेश संसदीय दलका नेता इन्द्रबहादुर आङ्बोमाथि मंगलबार ताप्लेजुङमा आक्रमण प्रयास भएको छ । माओवादी जिल्लास्तरीय बैठकमा सहभागी हुन गएका आङ्बोमाथि पहिचान पक्षधर आन्दोलनकारीले फुङ्लिङ नगरपालिका तक्मेडाँडा छेउमा आक्रमणको प्रयास गरेका हुन।

पहिचान पक्षधरका कार्यकर्ताले आक्रमण गर्दा उनी चढेको गाडीमा सामान्य क्षति पुगेको छ । उनीहरूले हत्या गर्ने चेतावनी दिँदै आङ्बोमाथि आक्रमण प्रयास गरेका हुन् । बाटो ढुकेर बसेका प्रदर्शनकारीले एक्कासी ढुंगा हान्दै नाराबाजी गरेको उनका स्वकीय सचिव पुजन मगरातीले बताए ।

यसअघि आईतवार मात्रै मुख्यमन्त्री हिक्मत कार्कीमाथि ओखलढुङ्गामा आक्रमणको प्रयास भएको थियो।  प्रदेशको नाम कोशी राखिएसँगै पहिचानवादीले पछिल्लो समय आन्दोलन गरिरहेका छन् ।

हिजोमात्र मुख्यमन्त्री हिक्मत कार्की चढेको गाडीमा ओखलढुंगामा आक्रमण प्रयास भएको थियो । आन्दोलनकारीले सिद्धिचरण नगरपालिका ११ गोरूमारे भन्ज्याङमा उनको गाडिमा तोडफोडको प्रयास गरेका हुन। आक्रमणकारीले मन्त्रीको गाडीमा प्रयोग हुने झण्डासमेत थुतेका छन् । 

कोशी प्रदेश नामांकनको विरोधमा उत्रिएका प्रदर्शनकारीहरूले मुख्यमन्त्रीलाई कालो झण्डासमेत देखाए। कोशी प्रदेश नामकरणको विरोध गर्दै नेपाल आदिवासी जनजाति महासंघ, किरात राई यायोक्खा लगायत पदाधिकारीहरुले विरोध प्रदर्शन गर्दै आएका छन् ।

कोशी प्रदेश इन्द्रबहादुर आङ्बो हिक्मत कार्की