सत्ताको प्रमुख दल नेपाली कांग्रेसबाट सरकारमा सम्मिलित हुने व्यक्तिहरुको नाम टुङ्गो लागेको छ। 

जानकारी अनुसार गृह मन्त्रालयको दाबी गरेका उपसभापति पूर्णबहादुर खड्का पार्टीबाट नेतृत्व गरेर सरकारमा जाने भएका छन् । तथापि, उनले गृहमन्त्रालय पाउने सम्भावना क्षीण छ ।

प्रधानमन्त्री पुष्पकमल दाहाल गृहमन्त्री आफ्नै दलबाट बनाउने पक्षमा छन् । गृह मन्त्रालय सम्भव नभए पनि खड्का पार्टीबाट नेतृत्व गरेर जान सहमत देखिएको शीर्ष तहका एक नेता बताउँछन् ।

संस्थापन पक्षबाट नाम फाईनल छ। उपसभापतिद्वय पूर्णबहादुर खड्का र धनराज गुरुङ मन्त्री बन्ने निश्चित छ । प्रवक्ता डा. प्रकाशशरण महत, केन्द्रीय सदस्यद्वय एनपी साउद र सीता गुरुङ मन्त्री हुनेको सूचीमा छन्।

२ मन्त्री र १ राज्यमन्त्रीको नाम पार्टीभित्र चयन हुन बाँकी छ । सात मन्त्रीबाट संस्थापनइतरले ३ माग गरे पनि दुई जना मात्रै पाउने अवस्था रहेको नेताहरु बताउँछन् । त्यसो हुँदा संस्थापन पक्षले मन्त्री र राज्यमन्त्री १÷१ र संस्थापनइतरले १ जना मन्त्रीको नाम टुंगो लगाउनुपर्ने हुन्छ ।

उपसभापति गुरुङ संस्थापनइतरबाट मन्त्री हुने पहिलो सूचीमा छन् । संस्थापनइतरमा पहिलो वरीयता हुनुको साथै जनजाति हुनुको लाभ उनले उठाउने भएका छन् ।

सभापति शेरबहादुर देउवाको सर्वाधिक जोडबल प्रवक्ता डा. प्रकाशशरण महतमा छ । देउवाले अर्थमन्त्रीको पदमा महतलाई पु¥याउन बल गरिरहेका छन् । नेतृत्व गरेर जाने इच्छा सहित महतले उपसभापति खड्कालाई रोक्न खोजिरहेको कांग्रेसभित्र चर्चा हुँदै आएको छ ।

अर्थ मन्त्रालयमा खड्काले जिम्मेवारी सम्हाले भने महतले परराष्ट्र मन्त्रीको दाबी गर्ने कांग्रेसका एक नेता बताउँछन् । महतसँग परराष्ट्र मन्त्रालय सम्हालेको अनुभव पनि छ । तर, महत निकट एक नेताका अनुसार अर्थ मन्त्रालय बाहेकमा उनको कम रुचि छ । उद्योगपति विनोद चौधरीको पनि यो मन्त्रालयमा जानका लागि तीव्र लबिङ छ ।

सहमहामन्त्री किशोर सिंह राठोर यसपटक मन्त्री भइछाड्ने पक्षमा छन् । संस्थापनबाट रामहरि खतिवडाको चर्चा पनि छ। तेजुलाल चौधरी, अजय चौरसिया र रमेश रिजाल मधेशबाट मन्त्रीका आकांक्षी हुन् ।

संस्थापन समूहबाट मोहन बस्नेत, उदयशमशेर राणा, वीरबहादुर बलायर लगायत पनि मन्त्रीको तीव्र आकांक्षी छन् । दीपक गिरी र दीपक खड्का मध्ये एक जनालाई शशांकले मन्त्री बनाउन चाहेका छन् ।

संस्थापनइतरमा जीवन परियार, बद्री पाण्डे, सञ्जय गौतम, डिगबहादुर लिम्बु मन्त्रीको आकांक्षी छन् । युवापुस्ताबाट मन्त्री हुनेको नाममा प्रदीप पौडेलको चर्चा छ ।

कांग्रेसले अर्थ, परराष्ट्र र रक्षासहित ७ मन्त्रालय पाउने सम्भावना छ । पार्टीले कुन–कुन मन्त्रालय पाउँछ भन्ने निश्चित भएसँगै त्यस अनुसार व्यक्ति छनोट हुने नेताहरु बताउँछन् ।