आईसीसी क्रिकेट विश्वकप लिग टुअन्तर्गत त्रिदेशीय सिरिजमा यूएईविरुद्ध नेपालले २३० रनको लक्ष्य दिएको छ । नेपालले निर्धारित ५० ओभरमा आठ विकेट गुमाएर २२९ रन बनाएको छ।

दुवई अन्तर्राष्ट्रिय क्रिकेट रंगशालामा टस जितेर ब्याटिङ गरेको नेपालका लागि भीम शार्कीले उत्कृष्ट ब्याटिङ गरे । मिडिल अर्डर ब्याटरको उत्कृष्ट प्रदर्शनमा नेपालले यूएईलाई प्रतिस्पर्धात्मक लक्ष्य दिएको हो ।

भीमले ९९ बलमा सात चौका प्रहार गर्दै ७० रन बनाए । भीमले पहिलो एकदिवसीय अन्तर्राष्ट्रिय क्रिकेटमा पहिलो अर्धशतक समेत बनाएको छ । उनले सातौँ विकेटका लागि आरिफ शेखसँग ५६ रनको साझेदारी गरे । यसअघि उनले छैटौँ किवेटका लागि सन्दीप लामिछानेसँग ५६ रनकै साझेदारी गर्दै नेपाललाई उकासेका थिए ।

यसअघि सन्दीप २७ रन आउट भए । सन्दीप र भीमले नेपालको पारी उकासेका थिए । सन्दीप भन्दाअघि नेपालका लागि कुशल मल्ल ३२, ज्ञानेन्द्र मल्ल ११, आशिफ ६, दीपेन्द्रसिंह ऐरी चार र कप्तान रोहितकुमार पौडेल एक रनमा आउट भएका थिए ।

१४ रन हुँदा पहिलो विकेटको रूपमा आशिफलाई गुमाएको नेपालले दोस्रो विकेटको रूपमा ज्ञानेन्द्रलाई गुमाएको थियो । त्यसपछि चौथो नम्बरमा ब्याटिङ गर्न आएका कप्तान रोहित पनि सस्तैमा समेटिएपछि नेपाल दबाबमा आएको थियो । ६८ रन हुँदा नेपालले पाँच विकेट गुमाएको थियो ।

यूएईका जुनाइद सिद्धिकले तीन, आर्यन लाक्रा र रोहमन मुस्तफाले समान २–२ विकेट लिए ।