भारतीय प्रधानमन्त्री नरेन्द्र मोदीको निमन्त्रणमा प्रधानमन्त्री पुष्पकमल दाहाल बैशाखको तेस्रो साता भारत भ्रमणमा जाने भएका छन् । नेपालका लागि भारतीय राजदूत नविन श्रीवास्तवले गत सोमबार बालुवाटारमा प्रधानमन्त्रीलाई भेटी भारत भ्रमणको निम्तो दिएको स्रोतले जनाएको छ।

राजदूत श्रीवास्तव अघिल्लो साता दिल्ली गएका थिए । उनले त्यहाँ प्रधानमन्त्री दाहालको भ्रमणको चाँजोपाँजो मिलाएको जनाईएको छ। दाहाल भ्रमणमा जाने निश्चित मिति भने तय भएको छैन्। अब बस्ने मन्त्रिपरिषद् बैठकले प्रधानमन्त्रीको भारत भ्रमणको मिति टुंग्याउने छ । 

परराष्ट्र मन्त्रालयले पनि प्रधानमन्त्रीको भारत भ्रमणको तयारी सुरू गरेको छ ।  एमालेको समर्थनमा माओवादी केन्द्रका अध्यक्ष प्रचण्ड पुस ११ गते प्रधानमन्त्रीमा नियुक्त भएका थिए । राष्ट्रपति बनाउने विषयमा असमझदारी भएपछि दाहालले एमालेसँगको गठबन्धन तोडेका थिए । राष्ट्रपति निर्वाचनका बेला दाहाल नेपाली कांग्रेससँग नजिकिएका थिए ।

नेपाली कांग्रेसका वरिष्ठ नेता रामचन्द्र पौडेललाई राष्ट्रपतिमा सघाएपछि दाहाललाई अहिले कांग्रेसको समर्थन रहेको छ । राष्ट्रपति निर्वाचन, फेरिएको सत्ता गठबन्धन, मन्त्रिमण्डलको पूर्णतालगायतका आन्तरिक समस्याका कारण प्रधामन्त्री दाहालको भारत भ्रमण ढिला भइरहेको थियो । 

भारतले समेत आन्तरिक समस्या हल भएपछि प्रधानमन्त्री दाहालको भारत भ्रमण गराउने भन्दै उचित समय पर्खिरहेको थियो । सरकारले लगभग पूर्णता पाएको र आन्तरिक समस्याहरू समाधानतर्फ उन्मुख भएको महशुस गरेपछि भारतले प्रधानमन्त्री दाहालको भारत भ्रमणको मिति पक्का गरेको हो ।