राष्ट्रपति रामचन्द्र पौडेलको उपचार भारतको नयाँ दिल्लीस्थित अल इण्डिया इन्स्टिच्युट अफ मेडिकल साइन्सेस (एम्स)मा सुरू भएको छ । बुधवार बिहान श्रीएयरको एयर एम्बुलेन्समार्फत एम्समा पु¥याए लगत्तै उपचार सुरू गरिएको हो।

नेपालमा उपचार गराउँदा उल्लेख्य सुधार नभएको भन्दै परिवारका सदस्यहरु र चिकित्सकहरुले थप उपचारका लागि भारत लैजान सझाव दिएका थिए। राष्ट्रपति पौडेलको छातीमा संक्रमण देखिएको थियो। 

छातीमा संक्रमण देखिएपछि उपचार निगरानीमा रहेका राष्ट्रपति पौडेल सोमबार नियमित फलोअपमा अस्पताल गएका थिए । उपचारमा संलग्न एक चिकित्सकका अनुसार त्यही दिन छातीमा जमेको पानी निकालेर परीक्षण गरिएको थियो । प्रारम्भिक परीक्षणमा संक्रमणबाहेक अन्य अवस्था सामान्य देखिएको ती चिकित्सकले बताए ।
 
पौडेलसँग उनका निजी चिकित्सक डा. निरज बम, परिवारका सदस्य र ७ जना चिकित्सकको टोली भारत गएको छ । नयाँदिल्ली नपुन्जेलसम्म हवाई यात्राका क्रममा राष्ट्रपति पौडेलको उपचार र निगरानीमा त्रिवि शिक्षण अस्पतल र नर्भिक अस्पतालको चिकित्सकको टोली खटिएको थियो।

परिवारकै आग्रहमा पौडेललाई नयाँदिल्लीस्थित एम्स लगिएको हो । छातीमा संक्रमण देखिएर उनी गत साता तीन दिन अस्पताल बसेर फर्केका थिए। मंगलबार असहज भएपछि उनलाई पुनः अस्पताल भर्ना गरिएको हो । 

अघिल्लो दिनको तुलनामा मंगलबार असहज महसुस हुनासाथ राष्ट्रपति पौडेललाई त्रिवि शिक्षण अस्पताल पु¥याइएको थियो । शीतलनिवास स्रोतका अनुसार बिहानसम्म अवस्था सामान्य थियो । सोमबारसम्म उनी नियमित भेटघाटमै व्यस्त थिए ।