को–पाईलटलाई पखाला चलेपछि जगेडा को–पाईलटको ब्यवस्था गर्न नसक्दा शनिबार राति नेपाल वायु सेवा निगमको काठमाडौं–दुबई–काठमाडौंको उडान रद्द भएको छ। उडान रद्द हुँदा दुवैतर्फ कम्तीमा ५ सय ४३ यात्रु अलपत्र परेका छन् ।

राति १२ बजे दुबईका लागि तय गरिएको उडान नम्बर– आरए२२९ को उडान अन्तिम समयमा रद्द भएको थियो। त्यसपछि बोर्डिङपास लिइसकेका २ सय ६६ यात्रुलाई सिनामंगल, गौशाला, ज्ञानेश्वरका होटलहरुमा राखिएको छ ।

निगमले उडान रद्द गरेपछि यात्रुहरुले नाराबाजीसमेत गरेका छन्। दुबईबाट आइतबार बिहान ४ बजे काठमाडौंका लागि तय भएको यसै विमानको उडान (आरए२३०) उडान पनि रद्द भएको छ । त्यहाँका यात्रुलाई पनि होटलमा राखिएको छ।

शनिबार राति साढे १० बजे दिल्लीबाट फर्केको निगमको मकालु नेपाली नाम भएको वाइडबडी विमानलाई दुबई उडानका लागि राखिएको थियो । त्यो जहाज दिल्लीबाट उडाएर ल्याउने क्याप्टेन योगेश हिराचन र को–पाइलट गोपालसिंह विष्ट नै दुबई जानुपर्ने तालिका थियो । तर, जहाजमा उपलब्ध हुने खानाले ‘फुड प्वाइजन’का कारण पखाला लागेपछि को–पाइलट विष्टले ‘सिक रिपोर्ट’ गरेका थिए ।

विष्ट जान नसक्ने भएपछि निगमको फ्लाइट अपरेसनले बिदामा रहेका पाइलटको खोजी गर्दा एक जना क्याप्टेनलाई दुबई उडानका लागि अनुरोध गरेका थिए । तर, ती क्याप्टेनले मदिरा सेवन गरिसकेकाले आफू उड्न नसक्ने जानकारी दिए।