धेरै नेपाली ग्राहक पुग्ने भारतको जोगबनी बजारमा गोली हानाहान भएको छ । मोरङको विराटनगरनजिकैको रहेको उक्त बजारमा गोली हानाहान हुँदा एक भारतीय नागरिक घाइते भएका छन् ।

नेपाल–भारतको दरैया नाकानजिकै जोगबनी–४, टिकुलिया बस्तीमा सोमबार बिहान गोली हानाहान भएको हो । घट्नामा लागुऔषध कारोबारी संलग्न रहेको जनाईएको छ। गोली लागेर टिकुलिया बस्तीका ३७ वर्षीय अंकित सिंह घाइते भएका छन् । उनको मुखमा गोली लागेको छ।

घाईते सिंहको विराटनगरस्थित विराट नर्सिङ होममा उपचार भइरहेको छ । गोली प्रहार गर्ने र घाइते दुवै लागुऔषध कारोबार गर्ने गिरोेहका सदस्य रहेको खुल्न आएको नेपाल प्रहरी स्रोतले जनाएको छ ।

जोगबनी घरायसी सरसामान किन्न धेरै नेपाली पुग्ने बजार हो । विगतमा यस किसिमका घटना भइरहने जोगबनी पछिल्लो समय शान्त थियो ।