वीर अस्पतालमा कार्यरत नर्सको मृत्यु प्रकरणमा विराटनगरको कोशी अस्पतालमा कार्यरत डाक्टर विरुद्ध किटानी जाहेरी परेको छ ।

नर्स अनुमा श्रेष्ठका परिवारले कोशीमा कार्यरत डाक्टर सुजन ढकालविरुद्ध आत्महत्या दुरुत्साहनको कसूरमा जाहेरी दिएको हो। प्रहरी वृत्त, बालाजुमा डा. ढकाल र उनका बाबुविरुद्ध परिवारले जोहरी दर्ता गराएको छ।

‘घटनाबारे विस्तृत अनुसन्धान प्रहरीले गरिरहेको छ’ डीएसपी मनोजित कुँवरले भने–‘शव त्रिवि शिक्षण अस्पतालमा छ ।’

भरतपुर महानगरपालिका–१ घर भएकी २९ वर्षकी अनुमा श्रेष्ठ बालाजुस्थित डा. ढकालको कोठामा शनिबार मृत अवस्थामा फेला परेकी थिइन् ।

वीर अस्पतालमा कार्यरत आठौं तहकी स्थायी नर्सिङ अधिकृत अनुमान मृत भेटिएको स्थानबाट प्रहरीले सुसाइड नोट पनि बरामद गरेको थियो ।

नोटमा ४ वर्षदेखि प्रेम सम्वन्धमा रहेको र विवाह नभएको विषय उल्लेख गरिएको छ । पारिवारिक स्रोतका अनुसार डा. ढकाल र श्रेष्ठ लामो समयदेखि प्रेम सम्बन्धमा थिए । यसबारे परिवारलाई पनि जानकारी थियो र आउजाउ भइरहने गरेको प्रहरीले जनाएको छ ।

पछिल्लो समय श्रेष्ठले विवाह गर्न पटकपटक भन्दा ढकालले नमान्ने गरेको पाइएको प्रहरीले जनाएको छ । 

पछिल्लो केही समययता नर्स श्रेष्ठ मानसिक समस्यामा रहेको अस्पताल स्रोतले जनाएको छ । उनी औषधि सेवन गर्दै मनोसामाजिक परामर्श पनि गराइरहेकी थिइन् । उनले यस अघि पनि विष सेवन गरेर आत्महत्याको प्रयास गरेकी थिईन।