नेपालको पहिलो महिला सगरमाथा आरोही  पासाङ ल्हामु शेर्पाले ज्यान गुमाएको ३० वर्षपछि उनका श्रीमान सोनाम शेर्पाले पनि सगरमाथाको सफल आरोहण गरेका छन् ।

पासाङ ल्हामुका श्रीमान् तथा यती समूहका अध्यक्ष सोनामले आज बिहान ७ बजेर ३४ मिनेटमा सगरमाथाको चुचरोमा पाइला टेकेका हुन।

यसअघि श्रीमती पासाङसँगै सगरमाथा चढ्न हिडेका सोनाम क्याम्प २ बाटै फर्केका थिए । तर, पासाङले २०५० वैशाख १० गते सगरमाथा आरोहण गरेकी थिइन् । फर्किने क्रममा उनको निधन भएको थियो ।

सोनामले यसअघि ६वटा महादेशका अग्ला हिमाल आरोहण गरिसकेका छन् ।  सगरमाथासमेत आरोहण गरेर उनले सातवटै महादेशका अग्ला हिमाल आरोहण गर्ने आफ्नो सपना पूरा गरेका छन् । 

‘सगरमाथाको चुचुरोमा पुग्ने बुबाको सपना पहिलेदेखिकै हो । तर पूरा भएको थिएन । उहाँले सेभेन समिटको तयारी गर्नुभएको थियो’ उनकी छोरी दावाफुटी शेर्पाले भनिन्–‘विशेष गरेर भूकम्पपछि उहाँले हिमाल चढ्ने तयारी गर्नुभएको हो ।’

सोनाम अप्रिल १७ मा काठमाडौंबाट सगरमाथाको लागि प्रस्थान गरेका थिए । सोनाम शेर्पासँगै आरोहणको टोलीमा जाङ्बु शेर्पा, पेमटेंगी शेर्पा, पेम्बा शेर्पा र फ्रान्सका रोबर्ट मोराचिनी पनि रहेका छन् । मंगलबार दिउँसो सगरमाथाको क्याम्प ४ मा पुगेका उनीहरुले हिजो साँझ ८ बजे त्यहाँबाट चुचुरोतर्फ प्रस्थान गरेका थिए ।

६३ वर्षीय शेर्पा सोलुखुम्बुको पासाङ ल्हामु गाउँपालिका वडा नम्बर १ पाङ्गोममा जन्मेका हुन् । उनी ५० वर्षदेखि नेपालको पर्यटन व्यवसायमा संलग्न छन्।