काभा वुमेन्स च्यालेञ्ज कप भलिबल प्रतियोगिताको आजको खेलमा नेपाल भारतसँग ३–१ को सेटमा पराजित भएको छ । प्रतियोगिता अन्तर्गत समूह चरणको आफ्नो अन्तिम खेलमा नेपाल पराजित भएको हो।

सुरुवाती दुई सेट क्रमसः २५–१२ र २६–२४ ले गुमाएको नेपालले तेस्रो सेट २५–२१ ले जितेर खेलमा फर्किने प्रयास गरेको थियो । चौथो सेटको आधा समयसम्म प्रतिस्पर्धात्मक भए पनि एक समय नेपालले १८–१५ को अग्रता बनाएर आशा जगायो। तर, त्यसपछि नेपालले ३ अंकमात्र जोड्दा भारतले १० अंक जोडेर खेल जित्न सफल रह्यो ।

यद्यपी दुवै टोली यसअघि नै सेमिफाइनलमा पुगिसकेका छन्। आजको खेलको नतिजाले समूह ए को विजेताको टुंगो लगाएको छ । नेपालले फाइनल प्रवेशका लागि अव दोस्रो सेमिफाइनल काजाकस्तानसँग खेल्नुपर्ने छ । नेपाल र काजाकस्तानबीचको खेल शुक्रबार हुने जनाईएको छ ।

बुधबारै भएको समूह बी अन्तर्गत अन्तिम खेलमा उज्वेकिस्तानलाई ३–१ को सेटमा हराएर काजाकस्तान समूह विजेता बनेको थियो ।