कैलालीको टीकापुर घटनामा तीनै तहका अदालतले दोषी ठहर गरी जन्मकैदको सजाय पाएका नागरिक उन्मुक्ति पार्टीका संरक्षक रेशम चौधरी जेलबाट छुटेका छन् ।

पूर्व सांसदसमेत रहेका चौधरीलाई राष्ट्रपति रामचन्द्र पौडेलले गणतन्त्र दिवसको अवसरमा कैद सजाय माफी दिएका हुन। मन्त्रिपरिषद्ले आइतबार बिहानै रेशमको करिब १५ वर्ष कैद सजाय माफी गर्न सिफारिस गरेको थियो ।

पाँच वर्ष ३ महिना जेल सजाय काटेका चौधरीको १४ वर्ष ९ महिना जेल सजाय माफी भएको हो । रेशमलाई लिन उनका बुबा र आमा डिल्लीबजार कारागार पुगेका थिए । उनको स्वागतका लागि  नागरिक उन्मुक्ति पार्टीका नेता कार्यकर्ता शुभेच्छुक डिल्लीबजार कारागार पुगेका थिए । रेशमलाई फूलमालाले भव्य स्वागत गरिएको छ ।

०७२ भदौ ७ मा टीकापुरमा भएको प्रदर्शन हिंसात्मक हुँदा ८ प्रहरी र एक नाबालकको ज्यान गएको थियो । रेशमलाई कैलाली जिल्ला अदालत र उच्च अदालत दिपायलले जन्मकैदको सजाय सुनाएका थिए भने उक्त फैसलालाई सर्वोच्च अदालतले जेठ २ मा सदर गरेको थियो ।