हिमपहिरोमा बेपत्ता भएका ५ मध्ये २ महिलासहित ३ को शव फेला
दार्चुला हिमपहिरोमा परेर वेपत्ता भएका ५ मध्ये तीन जनाको शव फेला परेको छ। व्यास–१ नाम्पा पाटननजिकको भोलिङमा यार्चागुम्बा संकलनका लागि बसेका बेला माथिबाट आएको हिमपहिरोमा पुरिएर उनीहरु वेपत्ता भएका थिए।
बेपत्ता भएका ५ मध्ये ३ जनाको शव बुधबार बिहान फेला परेको सहायक सिडिओ प्रदीपसिंह धामीले बताए । मृत्यु हुनेमा दुई महिला र एक पुरुष रहेका छन् । घटनास्थलभन्दा करिव ६ सय मिटर पर खोल्सामा शव भेटिएको उनले बताए । शवको सनाखत भने भएको छैन ।
सशस्त्र प्रहरी र जनपथ प्रहरी सीतापुलको टोलीले उद्धार गर्ने क्रममा उनीहरूको शव फेला पारेको हो । उक्त क्षेत्रमा हिउँका साथै पानी पनि परिरहेकाले उद्धार कार्यमा कठिनाइ आएको धामीले बताए ।
