कोभिडकालमा लकडाउन उल्लंघन गरेको घटनालाई लिएर जारी छानबिन माझ बेलायतका पूर्वप्रधानमन्त्री बोरिस जोनसनले सांसद् पदबाट राजीनामा दिएका छन् ।

५८ वर्षे जोनसनमाथि कोभिड महामारीका बेला डाउनिङ स्ट्रिटमा लकडाउनको उल्लंघन गरी राखिएको पार्टीबारे संसद्लाई ढाँटेको आरोप छ । यसबारे संसदीय छानबिनसमेत भइरहेको छ ।

उनले राजीनामा दिएपछि खाली हुने सिटमा उपनिर्वाचन हुनेछ । २०२२ मा प्रधानमन्त्रीको पद त्यागे पनि उनी सांसदको जिम्मेवारीमा कार्यरत थिए ।

अनुसन्धानले जोनसनको राजनीतिक भविष्यमा प्रभाव पार्ने सम्भावना छ। संसदको विशेषाधिकार समितिलाई बोरिस जोनसनले संसदलाई गुमराह गरेको पाइएमा १० दिनभन्दा बढीको लागि सदस्यता निलम्बन गर्न सिफारिस गर्ने अधिकार छ।

राजीनामाको क्रममा उनले आफूमाथि अनुसन्धान गरिरहेका सांसदविरुद्ध उग्र विरोध गरेका छन् । जोनसनले आफूलाई संसद्बाट बाहिर निकाल्ने प्रयास भइरहेको बताउँदै आएका छन् । केही पहिले उनले प्रमाणको एक टुक्रा पेस नगरी आफूविरुद्ध संसद्लाई गुमराहमा राखिएको बताएका थिए ।

बेलायतमा अर्को वर्ष आम निर्वाचन हुँदैन । जोनसनको कदमले सत्तारुढ कन्जरभेटिभ पार्टीभित्र गहिरो विवादलाई संकेत गरेको छ ।