भारतको गुप्तचर संस्था रअमा गोयललाई विस्थापित गर्दै आए सिंहा
भारतको बाह्य गुप्तचर अनुसन्धान र विश्लेषण शाखा (रअ) को प्रमुखमा रवि सिन्हा नियुक्त भएका छन् । सिन्हालाई मन्त्रिपरिषदको नियुक्ति समितिले सोमबार नियुक्त गरेको हो ।
दुई वर्षका लागि नियुक्त भएका सिन्हा छत्तीसगढ क्याडरका वरिष्ठ आईपीएस अधिकारी हुन। सन् १९८८ ब्याचका भारतीय प्रहरी सेवा (आईपीएस) अधिकृत सिन्हा मन्त्रिपरिषद् सचिवालयमा विशेष सचिवको रूपमा कार्यरत थिए ।
सिन्हा अटलबिहारी वाजपेयी सरकारको समयमा पुलिसको एसएसपीबाट रअमा आएका थिए । अहिले डीजीपी लेवलमा रहेका उनी जम्मु कश्मीर तथा उत्तर पूर्वी राज्यहरूमा चलाइएका कतिपय अपरेसनको नेतृत्वकर्ता हुन।
पाकिस्तान, अफगानिस्तान र चीनमा समेत काम गरेको अनुभव भएका सिन्हा सामन्त गोयलपछि दोस्रो वरीयताका अधिकारी हुन्। वर्तमान ‘रअ’ प्रमुख सामन्त गोयल जुन ३० मा अवकाशमा गएपछि सिंहाले उनको ठाउ लिनेछन्।
