फ्रेञ्च च्याम्पियन पिएसजीसँगको सम्झौता सकिएपछि अमेरिकी क्लव इन्टर मियामीमा अनुवन्धित भएका फुटवल स्टार लिओनल मेसीले डेब्यु खेलमै गोल गरेर टिमलाई विजय दिलाएका छन्।

अर्जेन्टाइन फरवार्ड  मेसीले अन्तिम समयमा गोल गरेपछि इन्टर मियामी लिग कप साउथ अन्तर्गत समूह सी को खेलमा विजयी भएको हो। मेसीले इन्जुरी टाइमको चौथो मिनेटमा फ्रिकिकमार्फत गोल गरेका थिए।

योसँगै इन्टर मियामीले क्रुज अजुललाई २–१ ले पराजित गरेको हो । उनी डेब्यु खेलमा दोस्रो हाफमा मैदान प्रवेश गरेका थिए । त्यसअघि थोमस टेलरले ४४औं मिनेटमा गोल गर्दै इन्टर मियामीलाई अग्रता दिलाएका थिए । क्रुजका उरियल अन्टुनाले ६५औं मिनेटमा गोल गर्दै खेल बराबरीमा ल्याए । 

तर मेसीले इन्जुरी टाइममा गोल गर्दै इन्टर मियामीलाई जित दिलाए । यसै समरमा पेरिस सेन्ट जर्मेन छाडेर मेजर सकर लिग क्लब इन्टर मियामी पुगेका मेसीको यो पहिलो गोल हो।