नेपालीमूलका आरोही निर्मल पुर्जाले ७ महिनाभित्र विश्वका १४ वटा ८ हजार मिटर अग्ला हिमाल चढेर बनाएको विश्वरेकर्ड तोडिएको छ।

०७६ कात्तिकमा बनाएको विश्ववकीर्तिमान नर्वेजियन हिम आरोही क्रिस्टिन ह्यारिला र नेपाली गाइड तेन्जिन ल्हामा शेर्पाले बिहीबार तोडेका हुन्। 

म्याग्दीमा जन्मिएका निर्मलले ८ हजार मिटरभन्दा अग्ला संसारका १४ वटा हिमाल ७ महिनाभित्र चढेर ०७६ मा रेकर्ड वनाएका थिए। ०७६ कात्तिक ११ गते सोमबार तिब्वतमा अवस्थित शिशापङ्मा हिमाल आरोहण गरेसँगै सात महिनामा विश्वका ८ हजार मिटरभन्दा अग्ला १४ हिमाल आरोहण गर्ने पहिलो पर्वतारोही बनेका थिए। 

तर उनको यो कीर्तिमान नर्वेजिन महिला हिम आरोही र नेपाली गाइड तेन्जिनले अभियान थालेको ९२ दिनमै तोडिदिएका हुन्। निर्मलले आफ्नो उक्त सफलतालाई विश्वभर ब्रान्डिङ गरेका थिए। भिडिओ र फोटोमार्फत उक्त सफलता संसारभर फैल्याएका उनको कीर्तिमान अब अर्का नेपाली गाइडको नाममा पुगेको छ।

‘सी मुभ्स माउन्टेन’ नाम दिइएको पर्वतारोहण अभियानका लागि क्रिस्टिनले ६ महिना ६ दिनको समय तय गरेकी थिइन् । तर, केवल ९२ दिनमा उनी ८ हजारमाथिका १४ वटा शिखर उक्लिन सफल भइन् ।

निर्मलभन्दा अगाडि दक्षिण कोरियाका किम चाङ–हो ले सबैभन्दा छिटो १४ हिमाल चढेका थिए । यसका लागि किमले ७ वर्ष, १० महिना, ६ दिन लगाएका थिए । उनले पनि थोरै समयले पोल्याण्डका जर्जी कुकुज्कालाई उछिनेका थिए । जर्जीलाई ८ हजार मिटर अग्ला १४ हिमालको यात्रा पूरा गर्न ७ वर्ष ११ महिना १४ दिन लागेको थियो । पछि किमको मृत्यु नेपालकै माउन्ट गुर्जामा आँधीमा परी भएको थियो भने जर्जीको मृत्यु पनि सन् १९८९ मा नेपालकै लोत्से हिमाल चढ्ने क्रममा भएको थियो ।

गत अप्रिलदेखि चीनका शिसापाङ्मा र चो ओयु, नेपालका मकालु, कन्चनजंगा, एभरेस्ट, लोत्से, धौलागिरि, अन्नपूर्ण, मनास्लु, पाकिस्तानका नाङ्गा पर्वत, जी २, जी १, ब्रोड पिक र के २ को चुचुरोमा टेक्ने अभियान थालेकी क्रिस्निटले आज २७ जुलाइको दिन अभियान सफल पारेकी हुन् । ‘लगभग सबै हिमालमा मरेका मान्छे छन् । मलाई त्यस्तो हुन्थ्यो भने म खुसी खुसी मर्थें’, हिमालय हेभनलाई दिएको प्रतिक्रियामा उनले भनेकी छन् । 

नेपालका तेन्जेनले हारिलाका लागि सहयोगी (गाइड) को काम गरेका थिए । क्रिस्टिनको पछिल्लो यात्रालाई सेभेन समिट कम्पनीले व्यवस्थापन गरेको थियो । कम्पनीका अनुसार, आज बिहान करिब ११ः३० बजे क्रिस्टिन र तेन्जेन सगरमाथापछिको दोस्रो अग्लो हिमाल उक्लेका थिए । क्रिस्टिनले तीव्र गतिमा हिमाल चढेर राखेका अन्य रेकर्ड पनि छन् । 

यसअघि उनी एक वर्ष ५ दिनमा ८ हजार मिटरमाथिका १४ वटै हिमाल चढ्ने पहिलो महिला पर्वतारोही बनेकी थिइन् । चीनका चो ओयु र शिसापाङ्गमा फेरि चढेमा उनको अर्को रकेर्ड बन्ने छ– ८ हजार मिटरमाथिका १४ वटा हिमाल दुई पल्ट पूरा गर्ने पहिलो पर्वतारोही ।

यी दुई हिमाल उनले गत वर्ष नै चढिसकेकी हुन्थिन् तर अनुमति नपाएकाले जान पाएकी थिइनन् । यो वर्ष उनले तिनै दुई हिमाल चढेर अभियानको सुरुवात गरेकी थिइन् । 

‘म जे गर्छु त्यसका थुप्रै कारण छन् । मलाई पहाड र सबैभन्दा अग्ला चुचुरामा सबैभन्दा शान्ति महसुस हुन्छ । यसैले मलाई हिमाल चढ्न प्रेरित गर्छ’, क्रिस्टिनले भनेकी छन् ।