भाई बुहारीको हत्या गरेर फरार भएको भनिएका सल्यानको शारदा नगरपालिका– १४ ढारखानीका ५४ वर्षिय वीरबहादुर गिरी मृत अवस्थामा फेला परेका छन्।

गिरीको शव घरभन्दा ४ किलोमिटर टाढाको खाली घरमा झुन्डिएको अवस्थामा फेला परेको हो। घाँस काट्न गएका स्थानीयले घरको बार्दलीमा झुन्डिएको अवस्थामा अवस्थामा देखेपछि प्रहरीलाई जानकारी गराएको जिल्ला प्रहरी कार्यालय दाङका डिएसपी दामोदर केसीले बताए।

साउन २१ गतेदेखि सम्पर्क विहिन भएको गिरीको शव भेटिएको घर उनकै दाजुको रहेको र उनीहरू हाल तुलसीपुरमा बस्दै आएको प्रहरीले जनाएको छ। वीरवहादुरले गत आइतबार बिहान ४६ वर्षीया प्रमिला गिरीको हत्या गरेको आरोप छ। घर नजिकै धारिलो हतियारले घाँटी काटेको अवस्थामा प्रमिला मृत फेला परेकी थिइन्।

यसअघि पनि वीरबहादुरले प्रमिलामाथि खुर्पा प्रहार गरेका थिए। कर्तव्य ज्यान उद्योगअन्तर्गत बुहारीले किटानी जाहेरी दिएपछि उनी पक्राउ परेका थिए भने डेढ वर्ष पूर्पक्षका लागि कारागारमा बसेपछि ६ महिना पहिला मात्रै डेढ लाख धरौटीमा छुटेको थिए।

पटक–पटक वीरबहादुले बुहारी प्रमिलामाथि किन आक्रमण गर्दै आएका थिए भन्ने बारे प्रहरीले केही खुलाएको छैन। हत्या भएको दिन घाँस काट्न भनेर गएकी श्रीमती घर आउन ढिला गरेपछि खोज्न गएका श्रीमानले हत्या गरिएको अबस्थामा फेला पारेका थिए ।