इन्दौरमा कुकुरका विषयमा विवाद हुँदा गोली चल्यो, दुई जनाको मृत्यु
भारतको मध्यप्रदेश स्थित इन्दौरमा कुकुरको विषयमा विवाद हुँदा एक व्यक्तिले अन्धाधुन्ध गोली चलाएका छन् । गोली लागेर दुई जनाको मृत्यु भएको छ।
राजपाल रजावत नाम गरेका व्यक्तिले बिहीबार राति गोली चलाउँदा दुई जनाको मृत्यु भएको छ भने ६ जना घाइते भएको प्रहरीले जनाएको छ।
सार्वजनिक भएको एउटा भिडियोमा राजपालले घरको झ्यालबाट बन्दुक चलाएको स्पष्ट देखिन्छ । इन्दौर प्रहरीका अनुसार बिहीबार राति राजपालका छिमेकी आफ्ना कुकुरलाई घुमाउँदै डुलिरहेका थिए । त्यसबीचमा छिमेकीको कुकुर र राजपालको कुकुर जुध्न थाले ।
कुकुर जुधेपछि कुकुर मालिकहरूबीच पनि भनाभन भयो । त्यसपछि रुष्ट बनेका राजपालले घरमाथि गएर बन्दुक चलाइदिए, जसकारण दुई जना व्यक्तिको मृत्यु भयो भने ६ जना घाइते भए ।
प्रहरीले यतिबेला राजपाललाई गिरफ्तार गरिसकेको छ । उनको बन्दुक पनि जफत गरिएको छ । प्रहरीका अनुसार बन्दुक चलाउने राजपाल बैंकका सुरक्षागार्ड हुन् ।
