प्रधानमन्त्री पुष्पकमल दाहालले सोमवार बोलाएको सर्वदलिय वैठकमा कांग्रेस सभापति शेरबहादुर देउवा र एमाले अध्यक्ष केपी शर्मा ओलीले गृहमन्त्री नारायणकाजी श्रेष्ठलाई हप्काएका छन्।

उनीहरुले अनुसन्धान टुंगोमा पुर्याउन खोज्नुको साटो आफू हिरो हुन खोजेको भन्दै श्रेष्ठको आलोचना गरे। देउवाले गृह प्रशासनले निष्पक्ष काम गर्नु साटो छानबिन क्रममा टर्चर दिने काम भएको भन्दै आक्रोश व्यक्त गरे। 

‘सरकारलाई हो सबैले विश्वास गर्ने । यस्तो तालले कसरी हुन्छ विश्वास’ भन्दै देउवाले गृहमन्त्रीलाई प्रश्न गरेका थिए। 

ओली पनि देउवाकै शैलीमा छानबिनमा पक्षपात गरेको भन्दै श्रेष्ठसँग कड्किएका थिए । उनले सुन काण्डमा नाम जोडिएका माओवादी नेता कहिले समातिन्छन् भनेर श्रेष्ठलाई सोधेका थिए । ‘एयरपोर्टमा सुन तस्करी भएको भयै रहेछ । समातेको सुन पनि घटेको घटेकै छ’ उनले भने–‘तपाई खुब बहादुरी गरेर बस्नुभएको छ ।’

गृहमन्त्रीले भने सिआइबीको मनोबल गिर्नेगरी कुनै अभिव्यक्ति नदिन नेताहरुलाई आग्रह गरेका थिए । उनले कुनै तलमाथि भएको भए पनि नियतवश नभएको भन्दै सरकारले सुशासनकै लागि प्रयास गरिररहेको भन्दै सहयोग मागेका थिए ।

देउवा पछिल्लो समय गृहमन्त्री श्रेष्ठलाई नै पदच्युत गराउने गरी रणनीति बनाईरहेका छन् । उनको सरोकार सुन काण्डमा भन्दा पनि भुटानी शरणार्थी प्रकरणमा केन्द्रीत छ। देउवाले गृहमन्त्रीको विकल्प खोज्न प्रधानमन्त्री पुष्पकमल दाहाललाई दवाव दिईरहेका छन्।

खास गरी नक्कली शरणार्थी प्रकरणमा दोस्रो चरणको अनुसन्धान गर्ने भनेर देखाइएको सक्रियता, ललिता निवास जग्गा हिनामिना प्रकरणबारे भइरहेको अनुसन्धान, गौर हत्याकाण्डका पीडितसँग भएको पाँचबुँदे सम्झौतादेखि सुन तस्करी घटनासम्म आइपुग्दा देउवा नाराणकाजीसँग त्रसित भएका छन्।

यस विषयमा देउवाले धेरै पटक प्रधानमन्त्री दाहालको ध्यानाकर्षण गराएका छन्। तर, आफूलाई समेत ‘क्रस’ गरेर गृहमन्त्री चलेको प्रधानमन्त्रीको जवाफ सुनेपछि देउवा श्रेष्ठको विकल्प खोज्ने तयारीमा लागेको स्रोतको भनाई छ।

भुटानी शरणार्थी प्रकरणमै थप अनुसन्धान अगाडि बढाएर आरजु देउवालाई नै तान्ने हुन् कि भन्ने सन्देहसमेत देउवालाई भएको स्रोतको दावी छ। अहिले देउवाको मुख्य चासो गृहमन्त्री श्रेष्ठको भूमिका निस्तेज बनाउने वा विकल्प खोज्नेतिर केन्द्रित रहेको माओवादी नेताहरू बताउँछन ।