चार राष्ट्र सम्मिलित ट्वान्टी–२० अन्तर्राष्ट्रिय प्रतियोगितामा नेपाल फाईनलमा प्रवेश गरेको छ। मलेसियाले शुक्रबार भएको खेलमा नेपाललाई ६ विकेटले पराजित गरेपनि फाईनलमा पुगेको हो।

क्वालालम्पुरस्थित बायुमास ओभल मैदानमा भएको खेलमा नेपालले ब्याटिङ गर्दै ७ विकेट गुमाएर ८३ रन बनाएको थियो । वर्षाका कारण १८ ओभरमा छोट्याइएको खेलमा डकवर्थ लुइस पद्दतिका आधारमा मलेसियाले ८५ रनको लक्ष्य पाएको थियो ।

मलेसियाले १६.२ ओभरमा लक्ष्य पूरा गर्दै नेपाललाई पराजित गर्यो। तर, नेपालसहित हङकङ प्रतियोगिताको शीर्ष दुई स्थानमा रहँदैं फाइनल पुगेका छन । फाइनल खेल शनिबार हुनेछ ।

राउन्ड रोबिन लिगका आधारमा हुने प्रतियोगिताको शीर्ष दुई टोलीले फाइनल तथा पुछारको दुई टोलीले तेस्रो स्थानका लागि प्ले अफ खेल्ने प्रावधान रहेको थियो । मलेसिया र कुवेत शनिबार नै तेस्रो स्थानका लागि प्ले अफ खेल्ने छन् ।

नेपाल, हङकङ र मलेसियाले समान २ खेल जिते पनि रन रेटमा मलेसियाभन्दा नेपाल र हङकङ अगाडि छन्। नेपालको ०.८५३४, हङकङको ०.१९२६ र मलेसियाको ०.००७१ नेट रनरेट छ।