क्विन्टल सुन प्रकरणको अनुशन्धान प्रहरीलाई जिम्मा
क्विन्टल सुन तस्करी प्रकरणको अनुसन्धानको जिम्मा प्रहरीको हातमा पुगेको छ। राजस्व अनुसन्धान विभागले अनुशन्धानको बाँकी काम प्रहरीलाई जिम्मा लगाएको हो ।
विभागले आइतबार यो प्रकरणमा संकलन भएका सबै प्रमाण र तथ्यहरु प्रहरीलाई जिम्मा लगाएको छ । अब यो प्रकरणका अनुसन्धान सिआईबीले गर्नेछ। सुन तस्करी प्रकरणको बृहत् अनुसन्धान गर्नुपर्ने भएकोले प्रहरीलाई जिम्मा दिने निर्णय भएको विभागले जनाएको छ।
पक्राउ परेका आरोपित, बरामद सबुत प्रमाण र अनुसन्धानको प्रगति प्रतिवेदन विभागको टोली प्रहरी महानिरीक्षक बसन्त कुँवरलाई हस्तान्तरण गरेको जनाईएको छ।
प्रधानमन्त्री पुष्पकमल दाहालले प्रहरी र राजस्वका उच्च अधिकारीहरुसँग बैठक गरी थप अनुसन्धान प्रहरीबाट अघि बढाउन गत बिहीबार निर्देशन दिएका थिए । प्रधानमन्त्रीले गत साता निर्देशन दिएपछि विभागले आइतबार सम्पूर्ण फाइलहरु बुझाएको हो ।
सरकारले संगठित अपराध, अन्तर्देशीय अपराध र आतंकवादसँग पनि जोडेर अनुसन्धान गर्न सीआईबीलाई यसको जिम्मा दिएको छ। सीआईबीमा वित्तीय र संगठित अपराध हेर्ने छुट्टै युनिट छन ।
अब प्रहरीले विशेष ब्युरो, साइबर ब्युरो र अन्य युनिटका विशेष टोलीलाई पनि अनुसन्धानमा खटाइने तयारी गरेको छ । हङकङबाट गत असार २९ मा क्याथे प्यासिफिकको जहाजमा स्कुटरका ब्रेक सुभित्र लुकाएर ल्याइएका सामान त्रिभुवन अन्तर्राष्ट्रिय विमानस्थलबाट भन्सार जाँचपास गरी बाहिरिएको थियो ।
त्यसलगत्तै विभाग र सशस्त्र प्रहरी बल (एपीएफ) को विशेष टोलीले भन्सारबाहिर सिनामंगल सडकबाट ब्रेक सुभित्र लुकाइएको सय किलो सुनसहित दुई जनालाई पक्राउ गरेको थियो । यो प्रकरणमा विमानस्थल भन्सारका तीन कर्मचारी, बेल्जियन, भारतीय र चिनियाँ गरी तीन विदेशी नागरिकसहित १८ जना पक्राउ परेका छन्।
अनुसन्धान तस्करीका मूल नाइकेसम्म पुगेको छैन । मूल गिरोह अझै अनुसन्धानको दायराभन्दा बाहिर छ । अनुसन्धानमा तानिएका व्यापारी राकेशकुमार अडुकिया फरार छन ।
