केही दिनअघि भक्तपुरको बाल सुधार गृहमा उत्पात मच्चाए बाल कैदीवन्दीले वीरगन्जको वीर्तास्थित बाल सुधार गृहमा पनि ताण्डव सुरु गरेका छन्।

उनीहरुकै उक्साहटमा मंगलबार राति ८ बजेदेखि बाल सुधार गृह तनावग्रस्त छ। भक्तपुरमा समस्या उत्पन्न गरेपछि १८ जना बाल कैदीबन्दीलाई वीरगन्जको बाल सुधार गृहमा सारिएको थियो । तर उनीहरुले यहाँ नबस्ने भन्दै विरोध जनाउँदै आएका थिए।

अहिले उनीहरुकै उक्साहटमा विरगञ्जमा रहेका अन्य बाल कैदीबन्दीहरुले मंगलबार राति ८ बजेदेखि उत्पात मच्चाएको बताइएको छ । उनीहरुले सुधारगृह भित्र तोडफोड गर्नुका साथै बाहिर रहेका प्रहरीमाथि ढुङ्गामुढा गरेका थिए। आज बिहान स्थिति सामान्य भए पनि प्रहरीहरुको सुरक्षा सतर्कता कायम राखिएको छ ।

जिल्ला प्रहरी कार्यालय पर्साका डिएसपी कुमार विक्रम थापाले आज बिहानको अवस्था सामान्य रहेको बताए । यद्यपि अहिले पनि बाल सुधार गृह बाहिर प्रहरी खटाइएको उनले जानकारी दिएका छन् । उनले बाल कैदीवन्दीमा विवाद भएर यस्तो अवस्था आएको वताए।

यसअघि यही भदौ ४ गते भक्तपुरको सानोठिमीस्थित बाल सुधार गृहमा पनि तनाव भएको थियो । एक जना कैदीबन्दीको मृत्यु भएपछि उत्पन्न तनावका बीच त्यहाँबाट केही कैदीबन्दीहरु भागेका थिए । त्यसपछि भक्तपुरमा रहेका १८ जना कैदीबन्दीलाई वीरगञ्जको बिर्तास्थित बाल सुधार गृहमा पठाइएको थियो ।