काठमाण्डौं महानगरपालिकाका मेयर बालेन्द्र साह प्रतिष्ठित टाइम म्यागजिनको ‘टाइम हन्ड्रेड नेस्क्ट’ सूचीमा परेका छन्। म्याग्जिनले यसवर्षका सय उदयीमान व्यक्तिको सूचीमा बालेन्द्रको पनि नाम समावेश गरेको छ ।

सन् २०१५ (विसं. २०७२) को विनाशकारी भूकम्पका बेला बालेन्द्रले जनताका साना तथा अत्यावश्यक आवश्यक्ता समाधानमा जोड दिएको उल्लेख गर्दै फोहोर विसर्जन, सरसफाइ, सुरक्षित पिउने पानी, सफा सडक र सहरी विकाससँगै सांस्कृतिक सम्पदाको संरक्षणमा साहले योगदान दिएको बताएको छ ।

‘शक्तिमा पुगेदेखि साहले ल्यान्डफिल साइट प्रयोग गर्न अधिकारीसँग सम्झौतामा हस्ताक्षर गरेका छन् । साथै, कुहिने र नकुहिने फोहोर व्यवस्थापन गर्ने घोषणा पनि गरेका छन’ टाइम म्यागजिनका लागि आस्था राजवंशीले लेखेकी छन् । सहरका गैरकानूनी संरचना भत्काएर आफ्ना प्रतिबद्धताको कार्यान्वयनमा बालेन अघि बढेको भन्दै म्यागजिनले प्रशंसा समेत गरेको छ ।

‘स्ट्रक्चरल’ इन्जिनियरिङमा स्नातकोत्तर गरेका ३३ वर्षीय बालेनले स्वतन्त्र रूपमा चुनाव लडेको उल्लेख गर्दै म्यागजिनले टिकटक, ट्विटर र इन्स्टाग्रामको प्रयोग गरेर मतदातामाझ बालेन इफेक्टको प्रयोग गरेको जनाइएको छ । ‘गत वर्षको स्थानीय चुनावमा यी स्वतन्त्र उम्मेदवारले दिग्गज राजनीतिज्ञमाथि विजय हासिल गरे’ म्यागजिनले लेखेको छ ।

टाइम म्यागजिनले कलाकार, प्रतिभावान पपगायक, अन्वेषक, नेता, वकालतजस्ता विधामा समेत प्रभावशाली व्यक्ति छनोट गरेको छ । आफ्नो क्षेत्रमा प्रभाव हासिल गरेका व्यक्तिलाई ध्यानाकर्षण गराउन म्यागजिनले टाइम १०० व्यक्तिको सूची तयार पारेको जनाइएको छ ।
 

बालेन्द्र साह टाइम म्यागजिन