खोटाङमा सडक निर्माणको जिम्मा लिएर काम नगर्ने ठेकेदर कम्पनीका निर्माण सामग्री नगरपालिकाले नियन्त्रणमा लिएको छ।  दिक्तेल रुपाकोट मझुवागढी नगरपालिकाले काम अलपत्र छाड्ने निर्माण कम्पनीको सामग्री मंगलबार नियन्त्रणमा लिएको हो ।

दिक्तेल–खोटाङ बजार सडकअन्तर्गत दिक्तेलस्थित अस्पतालचोकदेखि लफ्याङको दुबेचिवासम्मको सडक स्तरोन्नतिको ठेक्का लिएर अलपत्र पार्ने ढुकुछु÷बगाले÷बीएन्टी जेभीको औजार÷उपकरण नियन्त्रणमा लिइएको नगरपालिकाका प्रवक्ता दिनेश घिमिरेले वताए।

वडा नं. ५ लफ्याङका वडाध्यक्ष समेत रहेका घिमिरेका अनुसार एउटा स्काभेटर, दुईवटा टिपर, एउटा रोलर र ग्रेडर नियन्त्रणमा लिएको हो । यी उपकरणमध्ये ग्रेडर भगाउँदै गरेको अवस्थामा वडा नं. ७ दोर्पाचिउरी डाडाँको ढिकुरेबाट नियन्त्रणमा लिएको घिमिरेले बताए ।

यो कम्पनीको उपकरण २०७९ कात्तिक २० गते पनि नगरपालिकाले नियन्त्रणमा लिएको थियो । फेरि पनि कामै नगरी भाग्न खोजेपछि पुनः नियन्त्रणमा लिइएको घिमिरेले बताए ।

निर्माण कम्पनीले काम गर्ने प्रतिबद्धता जनाएपछि उपकरणमा लगाएको ताला खोलिएको घिमिरेको भनाइ छ ।