मापदण्द विपरित भण्डारण गरिएको र लेबल समेत स्पष्ट नदेखिएको भन्दै वाणिज्य विभागले काठमाण्डौंको सवैभन्दा ठुलो चिनी गोदाम सिल गरेको छ।

कुलेश्वरमा रहेको गृहेश्वरी ट्रेडलिंकको गोदामलाई कालोबजारी गरेको आरोपमा सिल गरिएको हो। चिनीको गोदाम सिल गरेर चिनीको गुणस्तर परिक्षणका लागि पठाइएको छ।

गोदाममा करिब ७० हजार किलो चिनी भण्डारण गरेको भेटिएको विभागका सूचना अधिकारी आनन्दराज पोखरेलले बताए। 

व्यवसायी सन्तोष खेतानको उक्त फर्मले उद्योगहरुबाट सस्तोमा खरिद गरेको चिनी काठमाडौंमा बिल बिजकविना नै महँगो मूल्यमा बिक्री गरेको आरोपमा विभागमा उजुरी परेको थियो ।

खुद्रा व्यापार संघका अधिकारीहरुका अनुसार १२७ रुपैयाँ किलो होलसेलमा चिनी बिक्री गरेर खेतानले १०५ रुपैयाँको मात्रै बिल दिने गरेका थिए ।

दुई साता अघिसम्म ११० रूपैयाँ किलोमा बिक्री भइरहेको चिनी पछिल्लो समय एकाएक १४० रूपैयाँ किलोसम्म पु¥याइएको छ ।

काठमाडौं उपत्यकामा चिनी बिक्रीमा खास व्यक्ति मानिएका खेतानको फर्मले नेपाली चिनी मिलबाट क्रसिङको समयमा सस्तोमा खरिद गरेका चिनी कृत्रिम भण्डारण गरेर चाडपर्वको मुखैमा महँगोमा बिक्री गर्ने गरेको पाइएको सरकारी अधिकारीहरुको दाबी छ ।

गोदामबाट ठूलो परिमाणमा दाल पनि बरामद भएको छ ।