शिक्षक सरुवाको विषयमा महोत्तरीमा विद्यार्थी र प्रहरीबीच झडप
शिक्षकको सरुवा गरेको आवेगमा महोत्तरीको सोनमा गाउँपालिका कार्यालयमा ढुङ्गामुढा गरेपछि विद्यार्थी र प्रहरीबीच झडप भएको छ ।
सोनमा माध्यमिक विद्यालयका विद्यार्थीहरुले गाउँपालिका कार्यालयमा ढुंगामुढा गरेपछि प्रहरीले हस्तक्षेप गरेको थियो। मंगलबार दिउँसो १ बजेदेखि गाउँपालिका कार्यालय क्षेत्र तनावग्रस्त छ ।
प्रहरीले हस्तक्षेप गरेपछि विद्यार्थीले प्रहरीमाथि पनि ढुंगामुढा गरेका छन् । स्थिति नियन्त्रणमा लिन प्रहरीले एक दर्जन भन्दा बढी सेल अश्रुग्यास हानेको छ ।
विद्यालयमा तीनजना शिक्षकको सरुवा गरेपछि विद्यार्थी आन्दोलनमा उत्रिएका हुन् । आन्दोलनमा संलग्नहरु विद्यार्थी भएकाले संयमता अपनाएर स्थिति सामान्य बनाउने प्रयास गरिरहेको महोत्तरीका एसपी प्रकाश मल्लले जानकारी दिए ।
