नेकपा माओवादी केन्द्रका दर्जनभन्दा बढी केन्द्रीय सदस्य नयाँ शक्ति पार्टीमा प्रवेश गर्दैछन् । सुदुरपश्चिमका सबैभन्दा बरिष्ठ बाम नेताका रुपमा चिनिने भीम कडायतको नेतृत्वमा माओवादीका दर्जनभन्दा बढी केन्द्रीय सदस्य नयाँ शक्तिमा प्रवेश गर्न लागेका हुन् । नेपाल आजसँग कुरा गर्दै कडायतले आर्थिक समृद्धि र आन्तरिक राष्ट्रियता मजबुत बनाउन नयाँ शक्ति प्रवेश गर्न लागेको बताए ।

पूर्वमन्त्री समेत रहेका कठायत एमाले उपाध्यक्ष भीम रावलका पनि राजनीतिक गुरु मानिन्छन् । २०४० सालमा अछामको सदरमुकामस्थित माध्यामिक विद्यालयको प्रधानाध्यापक रहेका कडायतले कम्युनिष्टहरु खाशै नरहेको सुदुरपश्चिममा कम्युनिष्ट आन्दोलनलाई उचाईँमा पुर्याउन विशेष भुमिका निर्वाह गरेका थिए । २०५१ सालमा एमालेले सुदुरपश्चिममा मात्रै ११ सिट जित्दा धेरै आश्चर्यमा परेका थिए । एमालेभित्रको अन्तरकलह चुलिँदा कडायत बामदेब गौतमको पक्षमा लागे । गौतमको पक्षमा लागेकै कारण उनलाई संस्थापनले पाखा लगाएको र उनीभन्दा कनिष्ठ रावललाई अगाडि बढाएको थियो ।

कडायतको पार्टी प्रवेशलाई नयाँ शक्तिले विशेष उपलब्धीका रुपमा लिएको बताइन्छ । सोह्र खुट्टेस्थित नेपा पार्टी प्यालेसमा पार्टी प्रवेश कार्यक्रम राखिएको छ ।

कडायतसँगै डडेल्धुराका चर्चित नेता जगत पार्की पनि माओवादी छाडेर नयाँ शक्तिमा प्रवेश गर्न लागेको बुझिएको छ । दलित अभियन्ता पार्की सुदुरपश्चिममा परिचित पात्र हुन् । अन्य नेताको नाम र हैसियत गोप्य राखिएको छ । माओवादीको डोटी जिल्ला कार्यसमिति सुन्यप्राय हुने गरी कडायतसँगै नेता कार्यकर्ता नयाँशक्तिमा आउन लागेको बताइन्छ ।

सुदुरपश्चिममा नयाँ शक्ति बलियो

नयाँ शक्तिको हालै बसेको बैठकले आफ्नो संगठन अरु प्रदेशको तुलनामा सात नम्बर प्रदेशमा बलियो रहेको निष्कर्ष निकालेको थियो । सात नम्बर प्रदेश सहसंयोजक पवित्रा तिमिल्सेनाले सात नम्बर प्रदेशलाई नमुना प्रदेशका रुपमा स्थापित गराउन आफुहरु लागेको बताइन् । अखण्ड सुदुरपश्चिमको पक्ष र विपक्षमा माओवादी केन्द्रका नेताहरु विभाजित भएसँगै माओवादी केन्द्र सो क्षेत्रमा रक्षात्मक बनेको थियो ।

थारुहरुको उल्लेख्य उपस्थिति रहेको कैलालीमा नयाँशक्तिको संगठन अन्य जिल्लामा भन्दा बलियो रहेको बताइन्छ । अछाम पुख्यौली भएका कडायत कैलालीको लम्कीमा बस्दछन् । ‘माओवादी केन्द्रमा पनि बस्ने, नयाँ शक्तिलाई सघाइरहने गरिरहन नैतिकताले मिलेन । त्यसैले प्रत्यक्ष लाग्ने भइयो ।’ नेपाल आजसँग कुरा गर्दै कडायतले भने ।

baburam bhattarai Naya Sakti Prachanda Puspakamal Dahal