युवा संघका सचिव नै भन्छन्, ‘आगजनी गलत छ, घर जलाएर खरानीको ध्वाँस किन ?’
नरेश शाही, सचिव युवा संघ नेपाल
सरकारी गाडी जलाउने बारेमा संगठनमा कुनै छलफल भएको छैन । संगठनको योजना पनि होइन । सरकारी सम्पत्ति जनताको हो । जनताको सम्पत्ति जलाउने कुरा एमालेको मुद्दा हुन सक्दैन । पाँच महिना अघि हामी सरकारमा थियौँ । आज छैनौँ, भोली हुन्छौँ । आफू सरकारमा नहुँदा सरकारी सम्पत्ति अर्काको ठान्ने प्रवृत्ति गलत हो । सरकारी गाडीको दुरुपयोग भएको हो भने दोष गाडीको होइन, कर्ताको हो । कर्ता जोगिने, सरकारी सम्पत्ति जल्ने कुरा जायज हुँदै होइन । यस्ता गतिविधिले संगठन र पार्टीलाई क्षति भइरहेको छ । चर्चामा आउन र आक्रोश व्यक्त गर्न यस्ता गतिविधि कतिपयलाई ठीक लाग्न सक्छन् । तर, त्यो घर जलाएर खरानीको ध्वाँस दिएजस्तै हो । कुनै अर्थ छैन । युवा संघ रचनात्मक र सृजनात्मक संगठन हो । संगठनको शक्ति दुरुपयोग हुने कुरा गम्भीर सवाल हो । यसबारे आवश्यक समीक्षा हुनेछ । जहाँसम्म हाम्रा साथीहरुमाथि भएको आक्रमण छ, त्यसको प्रतिरोध गर्नैपर्छ । राजनीतिक कारण भएका आक्रमणको प्रतिरोध गर्न सिंगो पंक्ति जुर्रमुराउनै पर्छ । तर, विरोधीलाई विरोध गर्ने मैदान दिने गरी र जनताको मनमा चिसो पस्ने गरी अराजक गतिविधि कुनैपनि मानेमा स्विकार्य हुन सक्दैन । संगठन त्यतिबेला बलियो हुन्छ, जतिबेला जनताको विस्वास जित्न सक्छ । हामीले हिजोको दिनमा जनताको माझमा जाँदा के भन्यौँ ? आगजनीको विरोध गर्यौँ । हिंसाको बिरुद्धमा आवाज बुलन्द गर्यौँ । आज आफैं हिंसा गर्ने ? यो हुँदैन । यो युवा संघको नीति र योजना होइन । अराजक गतिविधिलाई कुनैपनि मानेमा सही मान्न सकिदैन । आगजनी युवा संघको नीति र योजनामा भएको छैन । यसका बारेमा पार्टीले आवश्यक छानबिन गर्न अपरिहार्य छ । संगठन बदनाम हुनबाट जोगाऔँ ।
