साउन २२ । नेकपा क्रान्तिकारी माओवादीका अध्यक्ष मोहन बैद्यले सशस्त्र युद्धको घोषणा गरेका छन् । आफ्ना पूर्वसहकर्मी प्रचण्डले प्रधानमन्त्रीको कार्यभार सम्हालेको भोलिपल्ट बैद्यले रक्तपातपूर्ण संर्घषको तयारी गरिरहेको खुलासा गरेका हुन् । राज्यसत्ताको आधारभूत चरित्र परिवर्तन नभएकाले आफुले फेरि पनि बन्दुक बोक्न लागेको बैद्यको भनाइ छ ।

हिमालय टेलिभिजनको कार्यक्रम ‘यक्ष प्रश्न’मा पत्रकार नारायण पौडेलसँगको कुराकानीमा क्रान्तिकारी माओवादीका अध्यक्ष बैद्यले भने, ‘कार्यदिशा स्पष्ट छ । जनवादी राज्यसत्ता स्थापना गर्न सशस्त्र संर्घष अनिवार्य छ । मेरै नेतृत्वमा ठूलो पंक्तिले बन्दुक बोक्नेछ ।’

बैद्यले प्रचण्ड नेतृत्वमा भएको जनयुद्ध असफल भएको दाबी गरे । आफुहरुलाई धोका दिइएको भन्दै उनले राज्यसत्ता परिवर्तनका लागि आफुले नयाँ शिराबाट संशस्त्र संर्घषको तयारी गरिरहेको उनको भनाइ छ । बृद्धवय र कमजोर स्वाश्थ्यका बारेमा उठाइएको प्रश्नमा बैद्यले भावपूर्ण जवाफ दिएका थिए , ‘म ७० लागें । कम्तिमा १० बर्ष सक्रिय जीबन जिइन्छ । १० बर्ष भनेको धेरै हो । यो १० म थकाइ मारेर बस्दिन । सशस्त्र क्रान्ति गरेर छाड्छु ।’

प्रचण्ड पनि बन्दुक बोक्न बाध्य हुंँने कुराकानीका क्रममा प्रधानमन्त्रीसमेत रहेका नेकपा माओवादी केन्द्रका अध्यक्ष प्रचण्डलाई समेत सशस्त्र क्रान्तिमा सहभागी गराउने उनको दाबी छ । प्रचण्डसहित सबै माओवादी सशस्त्र संर्घषमा आउनै पर्ने उनको भनाइ छ । १० बर्षे माओवादी जनयुद्धको नेतृत्व गरेका प्रचण्डले बाटो बिराएको बैद्यको आरोप छ । प्रचण्ड संसदीय राजनीतिमा लागेको र माओवादी आन्दोलनलाई छिन्नभिन्न बनाएको भन्दै उनले पुर्नगठनका लागि आफु सक्रिय रहेको स्पष्ट गरे । बैद्यले बादल र विप्लवको बर्हिगमनका बारे प्रष्टिकरण दिंदै भने, ‘हिजो जनयुद्ध थाल्दा पनि एकता र विभाजनकै बीचबाट गएका थियौं । केही साथीहरु जाने र नयाँ साथीहरु आउने क्रम स्वभाविक हो । विचार भएपछि नेता कार्यकर्ता फैलदै जानेछन् ।’

प्रचण्डः के सोचेको के भए तत्कालिन मशालका महामन्त्री मोहन बैद्यले आफुलाई घटुवा गर्दै कनिष्ठ नेता प्रचण्डलाई महामन्त्रीमा बढुवा गरिदिएका थिए । त्यसपछि झण्डै २ दशक बैद्यले प्रचण्डलाई निरन्तर काँध थापे । यक्ष प्रश्नमा कुरा गर्दै बैद्यले प्रचण्डलाई के सोचेको थिएं के निस्किए भन्दै दुःख व्यक्त गरे । क्रान्तिको नायक बनाउन खोजेको व्यक्ति अर्कै कित्ताको हिरो भएको उनको भनाइ थियो । बिगतमा प्रचण्डपथसम्मको वकालत गरेका बैद्यले प्रचण्डलाई काँध थापेर गल्ति गरेको जनाए । प्रचण्ड क्षमतावान भए पनि उनको क्षमताको प्रयोग पछिल्लो दशकमा गलत ढंगबाट भएको बैद्यको निष्कर्ष छ । संसदीय व्यवस्थाबाट प्रचण्ड प्रधानमन्त्री हुनुको कुनै अर्थ नरहेको उनको भनाइ छ । बैद्य भन्छन्, ‘उहाँ यसरी प्रधानमन्त्री हुनुको अर्थ छैन । यो त हाम्रो उद्देश्य नै होइन । प्रधानमन्त्री भएपछि मेरो कुराकानी भएको छैन ।’

पार्टी एकताका बारेमा कुराकानी भइरहेको सन्दर्भमा प्रचण्ड झनै गलत दिशामा अघि बढेको उनको आरोप छ । जनवादी राज्य स्थापनाका लागि बैचारिक एकता कायम गर्दै पार्टी एकताका बारेमा वार्ता गम्भीररुपमा अघि बढे पनि प्रचण्डले धोका दिएको बैद्यको जिकिर छ ।

विप्लवले बन्दुक उठाउंँदैनन् आफुसँग अलग भइ गएका नेकपा माओवादीका महासचिव नेत्रविक्रम चन्दले बन्दुक नउठाउने बैद्यको दाबी छ । बैद्य भन्छन्, ‘विप्लवजीको ठूलै समस्या छ । उहाँमा वैचारिक स्पष्टता छैन । एकीकृत क्रान्तिमा स्पष्ट बाटो छैन । उहाँमा अलमल छ । उहाँले बोक्नुहुन्न, मै बोक्छु बन्दुक । मेरै नेतृत्वमा बन्दुक बोकाउने प्रयास गर्छु ।’

प्रचण्डको प्रधानमन्त्रीत्व जे बिऊ रोपेको त्यहीं फल फल्ने भन्दै बैद्यले प्रचण्डबाट असल कर्मको अपेक्षा नरहेको स्पष्ट गरे । प्रचण्डलाई प्रधानमन्त्री बनाइएको भन्दै उनले सकेसम्म सत्कर्म गर्न सुझाए । प्रचण्ड प्रधानमन्त्री हुंने बाटोमा लागेर गल्ति गरिसकेकाले धेरै टिप्पणीको आवश्यकता पनि नरहेको भन्दै बैद्यले कटाक्ष गरे ।

एउटा प्रचण्डले धोका दिए पनि थुप्रै इमान्दार प्रचण्ड क्रान्ति र आन्दोलनकै बीचबाट पैदा हुँने बैद्यको विश्वास छ । पश्चगामी प्रचण्ड भन्दा अग्रगामी प्रचण्डको आवश्यकता रहेको बताएका बैद्यले आफ्नो पार्टीमा थुप्रै क्षमतावान व्यक्तिहरु रहेको दाबी गरे ।

अध्यक्ष बैद्यको अन्तरवार्ता हेर्न तलको लिंकमा जानुहोस् ।