असोज २ । वर्षौं पहिले सम्झौता भई कार्यान्वयनमा नआएका दर्जनौँ विषयमा भन्दा पनि यसपटकको प्रधानमन्त्री पुष्पकमल दाहालको भारत भ्रमण सम्बन्ध सुधार तथा आपसी विश्वासको वातावरण बनाउनमै बढी केन्द्रित भएको छ ।

भारत भ्रमणमा निस्कनुभन्दा पहिले राष्ट्रपति विद्यादेवी भण्डारी, उपराष्ट्रपति नन्दबहादुर पुन, पूर्व प्रधानमन्त्री, पूर्व परराष्ट्रमन्त्री एवम् नेपाल–भारत सम्बन्धका जानकारसँग परामर्श लिएका प्रधानमन्त्री दाहालले यस भ्रमणमा सम्बन्ध सुधारलाई जोड दिएका हुन् । सामान्य अवस्थादेखि राजनीतिक परिवर्तनका कारण उतारचढाव हुने नेपाल–भारत सम्बन्धमा संविधानसभाबाट संविधान घोषणापछि अविश्वासको दूरी बढेको थियो ।

यसरी सम्बन्धमा उतारचढाव आए पनि भारत नेपालको अनन्य मित्र नै हो । ऐतिहासिक, राजनीतिक, सांस्कृतिक एवम् धार्मिक रुपमा दुई देश धेरै नजिक छन् । त्यसैगरी जनस्तरमा पनि गहिरो सम्बन्ध गाँसिएको छ । यस्ता सम्बन्धलाई सुमधुर बनाइराख्न पनि आपसमा भएका तीता मीठा कुरा आदानप्रदान गर्न अत्यन्त जरुरी हुन्छ ।

तिनै धरातलमा रहेर प्रधानमन्त्री दाहालले यसपटकको भ्रमण सम्पन्न गरेका छन् । उनले विगतमा भएका सन्धि सम्झौताको कार्यान्वयनमा जोड दिए । उनले कुनै नयाँ सम्झौतामा हस्ताक्षर गरेनन् । यसले पनि यस भ्रमणलाई आपसी सद्भावमा सीमित राखेको प्रतिनिधिमण्डलमा रहेका सदस्यको भनाइ छ ।

भ्रमणको समीक्षा गर्दैै नेपाल उद्योग वाणिज्य महासंघका अध्यक्ष पशुपति मुरारका भन्छन्, ‘यसपटक प्रधानमन्त्रीले दुई देशबीचको सम्बन्धलाई नयाँ उचाइमा पुर्‍याउनुभएको छ । यसले आगामी दिनमा विश्वासको वातावरण सिर्जना गर्छ भन्ने मैले विश्वास लिएको छु ।’ भदौ ३० गते भारत पुगेका प्रधानमन्त्री दाहालले भारतीय राष्ट्रपति प्रणव मुखर्जी, प्रधानमन्त्री नरेन्द्र मोदी, विहारका मुख्यमन्त्री नितेश कुमार, गृहमन्त्री राजनाथ सिंह, अर्थमन्त्री अरुण जेट्ली, ऊर्जा राज्यमन्त्री पियुस गोयल, पूर्व प्रधानमन्त्री मनमोहन सिंह, राष्ट्रिय सुरक्षा सल्लाहकार अजित डोभलगायतसँग भेटवार्ता गरेका थिए ।

उक्त भेटवार्ताका क्रममा प्रधानमन्त्रीले आफ्ना धारणा स्पष्ट राखेको परराष्ट्रमन्त्री डा. प्रकाशशरण महतले जानकारी दिए । उनले भने ‘विभिन्न तहमा भएका वार्ता र छलफलले दुई देशबीच विश्वासको वातावरण बनेको छ, यसले आपसी सहकार्यलाई नयाँ उचाइमा पु¥याएको छ । मन्त्री महतका अनुसार सद्भावना र सहयोग बढाउने भ्रमणको मूल लक्ष्य थियो त्यो पूरा भयो ।

राजनीतिक सम्बन्ध मजबुत प्रधानमन्त्री दाहाल भारत भ्रमणमा गएलगत्तै लामो समयदेखि भारतमा बस्दै आएका प्रवासी नेपाली, राजनीतिक दल एवम् नेतासँग भेटघाट गरे । अधिकांश राजनीतिक भेटघाट नेपाली दूतावासमा नै भएको थियो । मुख्यमन्त्री नितिसकुमार प्रधानमन्त्री दाहाललाई भेट्न नेपाली दूतावास पुगेका थिए ।

राजदूतावासमा प्रधानमन्त्री दाहालसँग नेसनललिस्ट कांग्रेसका महासचिव डिपी त्रिपाठी, भारतीय कम्युनिस्ट पार्टी माक्र्सवादीका महासचिव सीताराम यचुरी, जनता युनाइटेडका नेता शरद यादवलगायतका नेताले भेटवार्ता गरी दुई देशबीचको सम्बन्धलाई थप माथि उठाउने प्रतिबद्धता जनाए ।

उनीहरुले राजनीतिक एवम् जनस्तरबाटै दुई देशबीचको सम्बन्धलाई माथि उठाउने विषयमा छलफल भएको प्रधानमन्त्रीका प्रमुख राजनीतिक सल्लाहकार चक्रपाणि खनालले जानकारी दिए । उनले भने ‘प्रधानमन्त्रीको यसपटकको भ्रमणले दुई देशबीचको सम्बन्ध नयाँ उचाइमा पुर्‍याउन सफल भएको छ । सम्बन्ध मजबुत भएको छ ।’

लगानीका लागि भारतीय उद्योगी उत्साहित त्यसैगरी प्रधानमन्त्री दाहालले भ्रमणका सिलसिलामा नेपाल उद्योग वाणिज्य महासंघ र भारतीय उद्योगीको संस्था कन्फिडेरेसन अफ इन्डियन इन्डस्ट्रीले संयुक्त रुपमा आयोजना गरेको कार्यक्रमलाई सम्बोधन गर्ने क्रममा उद्योगी व्यवसायीलाई विश्वास दिलाएको अध्यक्ष मुरारकाको भनाइ छ ।

त्यसैगरी हिजो बिहान नेपालमा लगानी गर्दै आएका नेपालीले आयोजना गरेको अन्तक्र्रियामा पनि प्रधानमन्त्रीले उद्योगीलाई विश्वासमा लिन प्रयास गर्नुभएको र त्यसले सकारात्मक वातावरण सिर्जना गरेको उद्योग वाणिज्य महासंघका पूर्व अध्यक्ष सुरज वैद्यले बताए । उनले नेपालमा सरकार स्थिर हुने हो भन्ने लगानीको सम्भावना बढेर जाने अन्यथा २५ वर्षमा २४ वटा सरकार हुने अवस्थामा लगानीको सम्भावना हुँदैन भने । भ्रमणका क्रममा रहनुभएका नेपाल उद्योग परिसंघका अध्यक्ष हरिभक्त शर्माले छलफलका क्रममा सकारात्मक हुन सक्ने अवस्था देखिएको बताउँदै त्यसले आगामी दिनमा नेपालमा लगानीको अवस्थामा सुधार आउने विश्वास व्यक्त गरे । उनले भनाइ र गराईमा फरक नआए साँच्चै नेपाललाई परिवर्तन गर्न सकिन्छ भने ।

अन्तरक्रियाका क्रममा भारतीय उद्योगीका संस्था एफआइसिसिआइका अध्यक्ष सञ्जीव पुरीले लगानीका लागि अवसर भए पनि वातावरणले असर पार्ने भएकाले त्यसतर्फ ध्यान दिनुपर्नेमा जोड दिए । उनले प्रधानमन्त्रीको भारत भ्रमणले भारतीय लगानीकर्तालाई उत्साहित बनाएको धारणा राखे ।

त्यसैगरी एसोसिएटेड चेम्बर अफ कमर्स एन्ड इन्डस्ट्रिज अफ इन्डियाका व्यवस्थापन समितिका वरिष्ठ सदस्य एसएस अग्रवालले नेपाली र भारतीय उद्योगीलाई समान व्यापार गर्ने प्रधानमन्त्रीको प्रतिबद्धता महत्वपूर्ण भएको बताउँदै त्यसले भारतीय लगानीकर्तालाई उत्साहित बनाएको बताए । उनले कानुनी स्थिरता भएमा नेपालमा लगानीका थुप्रै सम्भावना रहेको त्यसले नेपालले चाहेको समृद्धिको बाटोलाई द्रुत गतिमा अगाडि बढाउने धारणा राखे ।

भ्रमणका विषयमा प्रतिक्रिया दिँदै नेपाल चेम्बर अफ कमर्सका अध्यक्ष राजेशकाजी श्रेष्ठले प्रधानमन्त्रीको उपस्थितिमा भारत र नेपालका चेम्बरबीच भएको सम्झौताले दुई पुरानो मित्रतालाई प्रगाढ बनाएको बताए । उनले भने ‘व्यवसायी उत्साहित छन्, लगानी आउने सम्भावना छ, दुई देशबीचको चिसोपना हटेको छ ।’

भ्रमणका क्रममा प्रधानमन्त्री दाहालले उद्योगी व्यवसायीलाई जलविद्युत, पर्यटन, कृषि एवम् जडीबुटीका क्षेत्रमा अपार सम्भावना रहेकाले भारतीय लगानीकर्ताको त्यसतर्फ ध्यान जानुपर्ने बताएका थिए । उनले लगानीका लागि सरकारले विश्वासको वातावरण बनाउने प्रतिबद्धता व्यक्त गरे ।