काठमाडौं । पुरुषोत्तम ढुंगेल अर्थात् नेपाली कांग्रेसका पूर्व नेता । झण्डै ३० वर्ष नेपाली कांगेसमा आबद्ध ढुंगेल अहिले कांग्रेस राजनीति छाडेर विवेकशील साझा पार्टीमा आबद्ध छन् । यति मात्र होइन, आफ्नो जवानी नेपाली कांग्रेसमा खर्च गरेका ढुंगेल अहिले विवेकशील साझा पार्टीका तर्फबाट काठमाडौं क्षेत्र नम्बर १ (ख) का उम्मेदवारसमेत हुन् ।

तीन दशक नेपाली कांग्रेसमा बिताएका ढुंगेललाई कांग्रेस राजनीति छाड्न सजिलो पक्कै थिएन । तर उनको अन्तर्आत्माले त्यसैलाई ठीक ठान्यो । र, चुनावी माहोलमा होमिए आफ्नै छोरा पुस्तासँग । हो, उनी अहिले मत माग्दै छन्, घर दैलो गर्दैछन्, विवेकशील साझा पार्टीलाई जिताउन आह्वान गर्दैछन् । यसमा उनमा कुनै पश्चाताप छैन । विवेकशील साझा पार्टीमा आबद्ध भएर अझै केही गरौं भन्ने जोस जाँगर छ उनमा । युवा पुस्तासँग काँधमा काँध मिलाएर देशमा केही गरौं भन्ने भाव छ उनमा ।

नेपाली कांग्रेसको राजनीतिसँग बिरक्तिएका उनी देश जहाँको त्यहीँ भएपछि विरक्तिएका छन् । ‘५० देखी ६० वटा उद्योग धन्दा बेचियो ठिकै छ, स्वाभिमान पनि बेचियो त्यो पनि ठिकै छ तर अब ती ठूला भनिएका राजनीतिक दलले हाम्रो राष्ट्रियता नै बेच्न लागेका छन् यो कसरी सहनु ?’ ढुंगेलले आक्रोश पोखे ।

यस्तो उद्घोष गरिरहँदा उनी अत्यन्तै भावुक र दुखित देखिएका थिए । बोल्दा बोल्दै उनको बोलीनै अवरुद्ध बनेको थियो ।

नेपाल आज फाउण्डेसनद्वारा शनिबार राजधानीमा आयोजित ‘रवीन्द्र मिश्रसँग सवाल जवाफ’ भन्ने कार्यक्रममा नेता ढुंगेलले उपस्थित जनतासँग भावुक बन्दै भने, ‘वडादेखि केन्द्रसम्म नेपाली कांग्रेसका ऋणी छन् । तर केवल म एक जना छु जसको ऋण नेपाली कांग्रेसले खाएको छ ।’

नेपालको धुलो खान आए रवीन्द्र मिश्र

उनी भन्छन्, ‘सुविधा सम्पन्न जागिर अनि सम्पूर्ण ऐश आराम छाडेर नेपालको धुलो खान आए रवीन्द्र मिश्र । समयक्रममा म उनीसँग नजिक भएँ । र उहाँलाई सहयोग गर्न आएको हुँ । देशको सम्वृद्धि आफ्नै पालामा हेर्न आतुर भएकाले पनि म विवेकशील पार्टीमा आएको हुँ ।’

देशलाई लुटेर खाने भागबण्डा उनलाई नेपाली राजनीतिको वास्तविक परिचय पनि मन परेको रहेनछ । ‘सेनामा भागबण्डा, पुलिसमा भागबण्डा के का लागि ? लुट्नका लागि मात्र हो र ? । यदि ठूला भनाउँदा दलले भागबण्डातिर नलागी देश हितमा लागे कति राम्रो हुन्थ्यो । कसैले हिमाल बनाउँछु त कसैले तराई बनाउँछु भनेर भाग लिएको भए आज जापान र सिंगापुरले हामीबाट देश विकास गर्ने तरिका सिक्थे । तर यस्तो कदापी भएन । बरु कसरी लुट्ने भनेर भागबण्डा लगाए,’ उनी भन्छन् ।

राजनीति पेसा होइन, सेवा हो

उनी भन्छन्, ‘मैले कहिले पनि रानीतिलाई पेसाको रुपमा लिएको छैन । यो त विशुद्ध सेवा गर्ने पद्धति हो । तर अहिलेसम्मका राजनीतिक दलले राजनीतिलाई पेसाको रुपमा लिए । यही कारण नेपाल यति पछाडि परेको हो ।’

 

 

Purushottom Dhungel