चितवन। चुनावी प्रचार अभियान अन्तरगत माडी पुगेका नेकपा माओवादी केन्द्रका अध्यक्ष पुष्पकमल दाहाल प्रचण्डले बाँदरमुढे स्मारकमा माल्र्यापण गरेका छन् ।
माडीको बाँदरझुला जाने क्रममा अध्यक्ष प्रचण्डले स्मारकमा पुगी श्रद्धाञ्जली व्यक्त गरेका हुन् ।सोही बाटो भएर बाँदरझुला जानुपर्र्ने भएपछि प्रचण्ड पहिलो पटक गाडीबाट झरेर बाँदरमुढे घटनास्थलमा पाईला टेकेका हुन् ।

विंस२०६२ साल जेठ २३ गते बिहान यात्रुले खचाखच भरिएको बस तत्कालिन नेकपा माओवादीको विद्युतीय धरापमा पर्दा ३९ जनाले बाँदरमुढे खोलामा ज्यान गुमाएका थिए भने ७५ जना घाइते भएका थिए ।

सो घटनामा तत्कालिन नेकपा माओवादीले ठूलो भूल भएको भन्दै सार्वजनिक माफि समेत मागेको थियो । पहिलो पटक प्रधानमन्त्री भएपछि माडीमा आयोजित ‘पहिलो माडी महोत्सव’को उद्घाटनका सिलसिलामा ०६९ फागुन १७ गते प्रचण्ड माडी पुगेका थिए ।

त्यसपछि माडी पुग्न नसकेका प्रचण्ड सोही क्षेत्र समेटेर बनेको निर्वाचन क्षेत्रका उम्मेदवार बनेपछि कार्तिक १८ गते माडी पुगेका थिए । उनले त्यो बेला पीडितसँग प्रत्यक्ष भेटघाट पनि गरेनन् भने सो घटनास्थलसम्म पनि पुगेनन् ।

पीडितसँग प्रचण्डले ०६३ कार्तिक ३ गते फुलबारीमा भेटेर न्याय दिलाउँछु भनेर प्रतिवद्धता पनि जनाएका थिए । तर, हालसम्म सो घटना गराउने व्यक्तिलाई कारवाही गरिएको छैन् ।