फागुन - २ । नेपाली काँग्रेसका सभापति शेरबहादुर देउवाले संविधानको प्रभावकारी कार्यान्वयनका लागि निर्धारित समयभित्र तीन तहको चुनाव सम्पन्न गर्नुपर्नेमा जोड दिएका छन्। प्रजातान्त्रिक प्राध्यापक सङ्घले आयोजना गरेको ‘प्रज्ञा दर्शन’ लोकार्पण कार्यक्रममा समयसीमाभित्र निर्वाचन हुन नसकेमा संवैधानिक सङ्कट आउने बताउँदै स्थानीय तहको निर्वाचन गर्नका लागि कानुन बनिसकेको बताए। पूर्वप्रधानमन्त्री देउवाले स्ववियुको निर्वाचनमा नेवि सङ्घले विजय हासिल गरेमा राष्ट्रिय राजनीतिमा नेपाली काँग्रेस सफल हुन सक्ने विचार व्यक्त गरे। महामन्त्री शशाङ्क कोइरालाले प्राध्यापकले विभिन्न क्षेत्रमा अनुसन्धान गरी प्रकाशित ‘प्रज्ञा दर्शन’ उपयोगी रहेको विचार व्यक्त गर्दै त्रिविका प्राध्यापक तथा विद्यार्थीले अनुसन्धानमूलक कार्य गर्नुपर्नेमा जोड दिए। उनले संविधान कार्यान्वयनका लागि चाँडो चुनावको मिति घोषणा गर्नुपर्नेमा जोड दिँदै सम्बन्धित प्रदेशका बासिन्दाको भावनालाई बुझेर उनीहरुको राय लिएरमात्र सीमाङ्कनको टुङ्गो लगाउनुपर्ने बताए। सांसद राजन केसीले त्रिवि क्षेत्रमा छात्रवास तथा प्राध्यापक आवास गृह निर्माणका लागि सहयोग गर्ने प्रतिबद्धता व्यक्त गरे। तरुण दलका अध्यक्ष जीतजङ्ग बस्नेत, नेवि सङ्घका अध्यक्ष नैनसिंह महरलगायतले मुलुकमा राजनीतिक परिवर्तनका लागि विद्यार्थी आन्दोलनको महत्व रहेको बताउँदै स्ववियुको आसन्न निर्वाचनको प्रक्रिया अगाडि बडिरहेको अहिलेको अवस्थामा निर्वाचन अवरोध गर्न नहुने बताए। कृतिका सम्पादक प्राडा दामोदर ज्ञवालीले कृतिमा ११ वटा लेख नेपालीमा तथा १९ वटा अङ्ग्रेजीका लेख समावेश गरिएको जानकारी गराए। समीक्षक प्रेमनारायण अर्याल, कृष्ण भण्डारी, त्रिवि प्राध्यापक सङ्घका अध्यक्ष घनश्याम भट्टराई, प्रजातान्त्रिक प्राध्यापक सङ्घ अन्तर्गत त्रिवि इकाइका अध्यक्ष शोभाकर कँडेल, प्रजातान्त्रिक प्राध्यापक सङ्घका महासचिव जगत तिमिल्सिनालगायतले पुस्तक प्रकाशनका उद्देश्य तथा त्यसमा समावेश सामग्रीकाबारेमा जानकारी गराए। रासस

Sher Bahadru Deuwa